وزیراعظم شہباز شریف کی زیرِ صدارت وفاقی کابینہ کے اجلاس میں خیبرپختونخوا کی سکیورٹی صورتحال پر گہری تشویش کا اظہار کیا گیا ہے، جبکہ صوبے میں آئین کے آرٹیکل 232 اور 234 کے تحت ایمرجنسی اور گورنر راج کے نفاذ سے متعلق فیصلے کی اطلاعات سامنے آئی ہیں۔ ذرائع کے مطابق حتمی اقدام سے قبل مولانا فضل الرحمان کے ذریعے صوبائی حکومت سے رابطے کی کوشش کی جا رہی ہے۔
ذرائع کے مطابق کابینہ اجلاس میں خیبرپختونخوا میں دہشت گردی کے خاتمے کے لیے صوبائی حکومت کے کردار پر تحفظات کا اظہار کیا گیا۔ کابینہ ارکان کا مؤقف تھا کہ دہشت گردی کے خلاف جنگ میں صوبائی حکومت کی جانب سے وفاق کے ساتھ تعاون نہ کرنا تشویش کا باعث ہے۔
ذرائع کا کہنا ہے کہ کابینہ میں تجویز دی گئی کہ خیبرپختونخوا کے حوالے سے کسی بھی حتمی فیصلے سے پہلے مولانا فضل الرحمان کے ذریعے صوبائی حکومت کو تعاون کا پیغام بھیجا جائے۔
اسی سلسلے میں اجلاس کے دوران نائب وزیراعظم اور وزیر خارجہ سینیٹر اسحاق ڈار نے مولانا فضل الرحمان سے ٹیلی فونک رابطہ کیا۔ ذرائع کے مطابق گفتگو میں زور دیا گیا کہ خیبرپختونخوا حکومت دہشت گردی کے خاتمے کے لیے وفاقی حکومت کا ساتھ دے۔
ذرائع کے مطابق وفاقی حکومت نے مولانا فضل الرحمان کے ذریعے صوبائی حکومت کو پیغام بھجوایا ہے کہ اگر صوبائی حکومت دہشت گردی کے خلاف کارروائیوں میں وفاق کے ساتھ تعاون کرتی ہے تو مجوزہ فیصلے پر نظرثانی ممکن ہے۔
دوسری جانب ذرائع کا دعویٰ ہے کہ وفاقی کابینہ میں خیبرپختونخوا میں ایمرجنسی اور گورنر راج، دونوں کے نفاذ کے امکانات پر غور کیا گیا ہے۔ شدید بدامنی سے متاثرہ 12 اضلاع کی صورتحال کا ایمرجنسی کے نفاذ کے بعد الگ سے جائزہ لینے کی تجویز بھی زیرِ غور ہے۔ گورنر فیصل کریم کنڈی کو نئی ذمہ داریاں سونپے جانے کا امکان بھی ظاہر کیا گیا ہے۔
ذرائع کے مطابق پاکستان تحریک انصاف نے خیبرپختونخوا میں ایمرجنسی یا گورنر راج کے نفاذ کی صورت میں عدالتوں سے رجوع کرنے کی حکمت عملی تیار کرلی ہے۔ پارٹی نے اپنا احتجاج جاری رکھنے کا بھی فیصلہ کیا ہے۔
وزیراعظم شہباز شریف نے کہا ہے کہ آئی ایم ایف کے ساتھ اسٹاف لیول معاہدہ ہو چکا ہے، معاشی اصلاحات کے لیے حکومتی کوششوں کو عالمی سطح پر پذیرائی ملی ہے، جبکہ پاکستان کی معاشی استحکام کی کاوشوں کا بھی اعتراف کیا گیا ہے۔ سعودی عرب پر حملے ناقابل قبول ہیں، حرمین شریفین کے تحفظ کے لیے پوری مسلم امہ متحد ہے۔
وفاقی کابینہ کے اجلاس سے خطاب کرتے ہوئے وزیراعظم شہباز شریف نے کہا کہ نیویارک میں آئی ایم ایف کی منیجنگ ڈائریکٹر سے مثبت گفتگو ہوئی، جس میں انہوں نے پاکستان کی معاشی استحکام کے لیے کی جانے والی کوششوں کو سراہا اور ان کوششوں کو ملک میں اہم تبدیلی قرار دیا۔
وزیراعظم نے کہا کہ اقتصادی ترقی اور خوشحالی کے حصول کے لیے حکومتی ٹیم نے مل کر کام کیا ہے اور ملک کو درپیش چیلنجز پر قابو پانے کے لیے دن رات کوششیں جاری ہیں۔ عالمی سطح پر پاکستان کی سفارت کاری کو بھی قدر کی نگاہ سے دیکھا گیا ہے۔
وزیراعظم شہباز شریف نے کہا کہ بدقسمتی سے مشرق وسطیٰ میں ایک بار پھر صورتحال کشیدہ ہو گئی ہے۔ خطے میں امن کے قیام کے لیے سفارتی کوششوں میں فیلڈ مارشل سید عاصم منیر نے اہم کردار ادا کیا، جبکہ نائب وزیراعظم اسحاق ڈار، وزیر داخلہ محسن نقوی اور پوری ٹیم کی کاوشیں قابلِ ستائش ہیں۔
انہوں نے کہا کہ پاکستان کی تمام کوششوں کا بنیادی مقصد خطے میں امن کا قیام ہے اور پاکستان کشیدگی کے خاتمے کے لیے اپنی سفارتی کوششیں جاری رکھے گا۔