غزہ کے جنوبی شہر خان یونس میں اسرائیلی فضائی حملے کے نتیجے میں حماس کے عسکری ونگ القسام بریگیڈز کے سینئر کمانڈر سمیر ابو یونس ہلاک ہوگئے۔
خبر رساں ادارے کے مطابق اسرائیلی فوج نے خان یونس کے علاقے المواسی میں فضائی کارروائی کے دوران حماس کے ایک اہم کمانڈر کو نشانہ بنانے کا دعویٰ کیا تھا، جس کے بعد القسام بریگیڈز نے سمیر محمود ابو یونس، المعروف ابو محمود، کی ہلاکت کی تصدیق کردی۔
غزہ کی سول ڈیفنس ایجنسی کے ترجمان محمود بسال کے مطابق امدادی کارکنوں نے حملے کے مقام سے 53 سالہ سمیر ابو یونس کی لاش نکال لی، جبکہ واقعے میں دو افراد زخمی بھی ہوئے۔
القسام بریگیڈز کے بیان کے مطابق سمیر ابو یونس تنظیم کی جنرل ملٹری کونسل کے رکن اور رفح بریگیڈ کے کمانڈر تھے۔ بیان میں کہا گیا کہ انہوں نے 1991 میں القسام بریگیڈز میں شمولیت اختیار کی اور تنظیم میں شامل ہونے والے ابتدائی ارکان میں شمار ہوتے تھے۔