پاکستان نے سعودی عرب کے ریاض میں کنگ خالد ایئرپورٹ پر حوثیوں کے حملے کی شدید مذمت کرتے ہوئے اسے دہشت گردی اور بین الاقوامی قوانین کی خلاف ورزی قرار دیا ہے۔
ترجمان دفتر خارجہ کے مطابق شہری ایئرپورٹ کو نشانہ بنانا علاقائی امن و سلامتی کے لیے سنگین خطرہ ہے۔ حملے میں جانی نقصان اور افراد کے زخمی ہونے کی اطلاعات پر پاکستان نے گہری تشویش کا اظہار کیا ہے۔
ترجمان دفتر خارجہ نے کہا کہ شہری آبادی اور اہم تنصیبات کو مسلسل نشانہ بنانا ناقابل قبول ہے، جبکہ حوثیوں کی جارحیت کو کسی صورت جائز قرار نہیں دیا جا سکتا۔ پاکستان نے مطالبہ کیا ہے کہ ایسے حملے فوری طور پر بند کیے جائیں۔
دفتر خارجہ کے مطابق پاکستان سعودی عرب کی قیادت اور عوام کے ساتھ غیر متزلزل یکجہتی کا اظہار کرتا ہے اور خطے میں امن و استحکام کے لیے شہری آبادی اور اہم تنصیبات کو نشانہ بنانے کی کارروائیوں کی مخالفت کرتا ہے۔