کوئٹہ کے علاقے نواں کلی کے قریب پاک فضائیہ کا زیرِ تربیت مشاق طیارہ تکنیکی خرابی کے باعث حادثے کا شکار ہوگیا، جس کے نتیجے میں دونوں پائلٹس شہید ہوگئے۔
پاک فوج کے شعبۂ تعلقاتِ عامہ (آئی ایس پی آر) کے مطابق حادثے میں انسٹرکٹر پائلٹ میجر حسنین شہزاد اور زیرِ تربیت پائلٹ کیپٹن عبدالصمد نے جامِ شہادت نوش کیا۔
وزیراعظم شہباز شریف نے کوئٹہ کے علاقے نواں کلی کے قریب تربیتی طیارے کے حادثے میں میجر حسنین شہزاد اور کیپٹن عبدالصمد کی شہادت پر گہرے دکھ اور افسوس کا اظہار کیا ہے۔
وزیراعظم نے شہداء کے اہلِ خانہ سے دلی تعزیت کرتے ہوئے دعا کی کہ اللہ تعالیٰ شہداء کے درجات بلند فرمائے اور سوگوار خاندانوں کو یہ ناقابلِ تلافی نقصان برداشت کرنے کا حوصلہ عطا کرے۔
شہباز شریف کا کہنا تھا کہ ملک کے لیے جانوں کا نذرانہ پیش کرنے والے بہادر سپوت پوری قوم کا فخر ہیں، جبکہ قوم شہداء کی قربانیوں کو قدر کی نگاہ سے دیکھتی ہے اور ان کے اہلِ خانہ کے غم میں برابر کی شریک ہے۔