سندھ ہائیکورٹ نے نجی اسکولوں کو ہدایت کی ہے کہ جون اور جولائی کی چھٹیوں کی فیس وصولی کا نوٹس مئی میں جاری کیا جائے جبکہ دونوں ماہ کی فیس کی ادائیگی کے لیے الگ الگ مقررہ تاریخیں دی جائیں۔
عدالت میں گرمیوں کی چھٹیوں کی فیس، کتابوں اور یونیفارم کی خریداری سے متعلق درخواست پر سماعت ہوئی۔ درخواست گزار کے وکیل نے مؤقف اختیار کیا کہ اسکول انتظامیہ فیس وصولی کے لیے بیک وقت دو دو واؤچر جاری کرتی ہے، جبکہ چھٹیوں کے دوران اسکول میں سرگرمیاں بھی نہیں ہوتیں۔
عدالت نے اسکول انتظامیہ کو ایک ساتھ فیس وصول کرنے سے روکتے ہوئے جون کی فیس کے لیے 30 جون اور جولائی کی فیس کے لیے 30 جولائی تک ادائیگی کی مہلت دینے کی ہدایت کی۔
کتابوں اور یونیفارم کے معاملے پر عدالت نے اسکول ڈائریکٹوریٹ اور دیگر فریقین کو آئندہ دو ہفتوں میں اجلاس کرکے معاملہ حل کرنے کی ہدایت کی۔ بعد ازاں عدالت نے درخواست نمٹا دی۔