چیئرمین پاکستان پیپلز پارٹی بلاول بھٹو زرداری نے وزیراعظم شہباز شریف اور اپوزیشن سے دوبارہ مذاکرات کا عمل شروع کرنے کی اپیل کرتے ہوئے کہا ہے کہ وفاقی حکومت اپوزیشن سے بات چیت کے لیے ایک بار پھر آگے بڑھے اور سیاسی معاملات کو مفاہمت سے حل کرنے کی کوشش کرے۔
میڈیا سے گفتگو کرتے ہوئے بلاول بھٹو زرداری نے تجویز دی کہ حکومت اور اپوزیشن دونوں کو مذاکرات کی طرف واپس آنا چاہیے کیونکہ ایمرجنسی کی صورتحال کو ہمیشہ برقرار نہیں رکھا جاسکتا۔ انہوں نے اس بات پر زور دیا کہ ملک میں سیاسی مسائل کے حل اور حالات کو معمول پر لانے کے لیے بات چیت کا راستہ اختیار کرنا ہی واحد حل ہے۔
ایک سوال کے جواب میں چیئرمین پیپلز پارٹی نے خیبرپختونخوا کے گورنر فیصل کریم کنڈی سے متعلق پارلیمانی اجلاس کی خبروں کی سخت تردید کی اور انہیں فیک نیوز قرار دیا۔
صحافی کی جانب سے پارلیمانی پارٹی اجلاس میں گورنر کے پی کے پر غصہ ہونے کے سوال پر انہوں نے وضاحت کی کہ اس وقت گورنر خیبرپختونخوا پر پہلے ہی بھاری ذمہ داریاں عائد ہیں، اس لیے وہ اپنے ہی گورنر پر کیوں غصہ کریں گے۔