وفاقی وزیر دفاع خواجہ آصف نے پارلیمنٹ ہاؤس میں میڈیا سے گفتگو کرتے ہوئے کہا ہے کہ تحریک انصاف کی قیادت اگر سوشل میڈیا کے اثرات سے باہر نکل آئے تو یہ ان کی سیاست کے لیے بہتر ثابت ہوگا۔
انہوں نے بتایا کہ پی ٹی آئی کے اندر سے ہی اب یہ آوازیں سامنے آ رہی ہیں کہ مزاحمت کے بجائے سیاست کی جانی چاہیے۔ ان کا کہنا تھا کہ اگر پی ٹی آئی مزاحمتی راستہ چھوڑ کر سیاست کی طرف آتی ہے تو اسے سیاسی میدان میں کافی جگہ مل جائے گی۔
مولانا فضل الرحمان کے حوالے سے بات کرتے ہوئے وزیر دفاع نے کہا کہ مولانا کے سخت بیانات پر انہوں نے صرف سیاسی نکتہ چینی کی ہے، تاہم وہ کسی دیگر لیگی رہنما کی مولانا سے متعلق گفتگو پر کوئی تبصرہ نہیں کرسکتے۔
سیاسی صورتحال پر گفتگو کرتے ہوئے ان کا کہنا تھا کہ سیاست میں کسی کے لیے بھی راستے مکمل طور پر بند نہیں ہوتے اور نہ ہی اس میں 'نو ریٹرن' کی کوئی پالیسی ہوتی ہے، یہاں کل کے دوست آج کے دشمن اور کل کے دشمن آج کے دوست بن جاتے ہیں۔