عالمی بینک نے پاکستان کی معاشی صورت حال سے متعلق رپورٹ جاری کرتے ہوئے کہا ہے کہ ملک میں معاشی استحکام کے باوجود روزگار کے بڑھتے ہوئے تقاضے پورے کرنے کے لیے معاشی ترقی کی موجودہ رفتار ناکافی ہے۔
عالمی بینک کی رپورٹ کے مطابق پاکستان میں ہر سال تقریباً 36 لاکھ نوجوان روزگار کی تلاش میں لیبر مارکیٹ میں داخل ہو رہے ہیں، جس کے باعث روزگار کے نئے مواقع پیدا کرنا ایک بڑا چیلنج بن گیا ہے۔
رپورٹ میں بتایا گیا ہے کہ ملک میں مزدوروں کی آمدن میں کمی جبکہ مہنگائی میں اضافہ ہو رہا ہے، جس سے عوام کی معاشی مشکلات بڑھ رہی ہیں۔
عالمی بینک کے تخمینے کے مطابق رواں مالی سال پاکستان کی معاشی شرح نمو 3.8 فیصد رہنے کا امکان ہے، جبکہ گزشتہ مالی سال کے دوران ملک کی مجموعی قومی پیداوار (جی ڈی پی) کی شرح نمو 3.7 فیصد ریکارڈ کی گئی تھی۔
رپورٹ میں پیش کیے گئے اعداد و شمار کے مطابق پاکستان کو معاشی ترقی کے ثمرات عام شہریوں تک پہنچانے اور بڑھتی ہوئی افرادی قوت کے لیے روزگار کے مواقع پیدا کرنے کے لیے مزید مؤثر اقدامات کی ضرورت ہے۔