وفاقی وزیر داخلہ محسن نقوی نے لاہور میں این سی سی آئی اے کے دفتر میں میڈیا سے گفتگو کرتے ہوئے خواتین سے اپیل کی ہے کہ وہ خدارا کسی بھی صورت اپنی تصاویر اور ویڈیوز کسی کے ساتھ شیئر نہ کریں، کیونکہ ملزمان ان کے ذریعے انہیں بلیک میل کرتے ہیں۔
انہوں نے بتایا کہ سائبر کرائم کے پاس بچیوں سے ہراسانی کے کیسز سب سے زیادہ موصول ہو رہے ہیں، جس کے پیش نظر بچیوں اور عام آدمی کے لیے جلد ایک آگاہی مہم کا آغاز کیا جا رہا ہے۔ محسن نقوی نے شہریوں کو خبردار کیا کہ اگر کوئی آن لائن یا بیمار بن کر رقم کا مطالبہ کرے تو اسے ہرگز پیسے ٹرانسفر نہ کریں۔
انہوں نے مزید بتایا کہ پنجاب بھر میں این سی سی آئی اے کے پاس اس وقت 61 افراد پر مشتمل عملہ موجود ہے اور سائلین کے مسائل کے حل کے لیے نفری پوری کرنے کی کوشش کی جارہی ہے۔
ان کا کہنا تھا کہ این سی سی آئی اے نے کئی اہم کیسز میں ملزمان کو گرفتار کیا ہے اور سائبر پولیس کو ہر لحاظ سے مضبوط بنایا جائے گا، جبکہ سائبر کرائم میں ملوث افراد خواہ وہ سرکاری ملازم ہی کیوں نہ ہوں، ان کے خلاف بلا تفریق کارروائی کی جائے گی۔