سیکیورٹی فورسز نے ڈیرہ اسماعیل خان کے علاقے زرکانی میں انٹیلی جنس بیسڈ آپریشن کے دوران 6 بھارتی سرپرستی میں سرگرم خوارج کو ہلاک کر دیا، فائرنگ کے شدید تبادلے میں پاک فوج کے 2 جوان شہید ہو گئے۔
آئی ایس پی آر کے مطابق آپریشن 24 اکتوبر کو خوارج کی موجودگی کی اطلاع پر کیا گیا۔ شہید ہونے والوں میں نائیک غلام مرتضیٰ (عمر 36 سال، ضلع گجرات) اور سپاہی تاثیر احمد (عمر 30 سال، ضلع تلہ گنگ) شامل ہیں، جنہوں نے بہادری سے لڑتے ہوئے جامِ شہادت نوش کیا۔
آئی ایس پی آر کے مطابق ہلاک خوارج سے اسلحہ اور گولہ بارود بھی برآمد ہوا، ہلاک دہشت گرد سیکیورٹی فورسز، قانون نافذ کرنے والے اداروں پر حملوں اور معصوم شہریوں کے قتل سمیت متعدد دہشت گردانہ کارروائیوں میں ملوث تھے۔
علاقے میں ممکنہ طور پر موجود دیگر بھارتی سرپرستی میں سرگرم خوارج کے خاتمے کے لیے کلیئرنس آپریشن جاری ہے۔ آئی ایس پی آر نے کہا کہ عزمِ استحکام کے تحت ملک سے غیر ملکی سرپرستی میں ہونے والی دہشت گردی کے مکمل خاتمے کے لیے سیکیورٹی فورسز اور قانون نافذ کرنے والے اداروں کی کارروائیاں پوری رفتار سے جاری رہیں گی۔