امریکی صدر ڈونلڈ ٹرمپ نے کہا ہے کہ ایران امریکا کے ساتھ معاہدہ کرنا چاہتا ہے اور دونوں ممالک کے درمیان مذاکرات جاری ہیں، تاہم واشنگٹن ایسا طویل المدتی اور مضبوط معاہدہ چاہتا ہے جو مستقبل میں امریکی قیادت کی تبدیلی سے متاثر نہ ہو۔
صحافیوں سے گفتگو کرتے ہوئے ڈونلڈ ٹرمپ نے ایران کے ساتھ جاری مذاکرات کی تصدیق کرتے ہوئے کہا کہ ایرانی حکام معاہدے کے خواہاں ہیں، تاہم امریکا کسی عارضی سمجھوتے کے بجائے دیرپا معاہدہ کرنا چاہتا ہے۔
امریکی صدر کا کہنا تھا کہ واشنگٹن کی خواہش ہے کہ ایران کے ساتھ طے پانے والا معاہدہ طویل عرصے تک برقرار رہے اور مستقبل میں آنے والا کوئی بھی امریکی صدر اسے آسانی سے ختم نہ کرسکے۔
ٹرمپ نے کہا کہ معاہدہ اس قدر مضبوط ہونا چاہیے کہ امریکا میں مستقبل میں کوئی کمزور یا غیر مؤثر صدر بھی اقتدار میں آجائے تو بھی وہ ایران کے ساتھ طے پانے والے سمجھوتے کو متاثر نہ کرسکے۔
انہوں نے واضح کیا کہ امریکا کا مقصد محض وقتی مفاہمت نہیں بلکہ ایران کے ساتھ ایک مضبوط، جامع اور پائیدار معاہدہ کرنا ہے، جو دونوں ممالک میں حکومتوں کی تبدیلی کے باوجود برقرار رہے۔