نارتھ کراچی میں افسوسناک واقعہ پیش آیا جہاں بیٹے نے مبینہ طور پر اپنے 70 سالہ والد کو قتل کرکے سر دھڑ سے الگ کردیا اور سر لے کر فرار ہوگیا۔
پولیس حکام کے مطابق نارتھ کراچی سیکٹر 5 ایم میں واقع ایک گھر سے 70 سالہ نصیر احمد ولد خدا بخش شخص کی سر کٹی لاش برآمد ہوئی۔ ابتدائی تحقیقات میں مقتول کے بیٹے کو قتل میں ملوث قرار دیا گیا ہے، جو مبینہ طور پر اپنے والد کا سر ساتھ لے کر فرار ہوگیا۔
پولیس کے مطابق اہلخانہ نے بتایا ہے کہ ملزم کا ذہنی توازن درست نہیں۔ واقعے کی اطلاع ملنے پر پولیس موقع پر پہنچ گئی اور جائے وقوعہ سے شواہد اکٹھے کرلیے۔
پولیس نے مقتول کے سر کی تلاش شروع کردی ہے جبکہ فرار ملزم کی گرفتاری کے لیے بھی کوششیں جاری ہیں۔ واقعے کے تمام پہلوؤں سے مزید تفتیش کی جارہی ہے۔
ریسکیو حکام کے مطابق آج صبح نارتھ کراچی 4K چورنگی میزان بینک کے قریب کچرا کنڈی سے ایک شخص کا کٹا ہوا سر برآمد ہوا جسے عباسی شہید اسپتال منتقل کردیا گیا۔