نیا کورونا وائرس چند افراد کو زیادہ جبکہ چند پر معمولی اثر انداز ہوتا ہے، لیکن ایسا ہوتا کیوں ہے؟ اسی حوالے سے ماہرین کی جانب سے تحقیق کی گئی جس کے نتائج سامنے آ چکے ہیں۔
تفصیلات کے مطابق مریضوں کا جینیاتی تجزیہ کیا گیا جس کے بعد یہ معلوم ہوا کہ خون کا گروپ بھی اس بیماری کی شدت بڑھانے میں معاون کردار ادا کرتا ہے۔
تحقیق میں یورپ کے ہزاروں مریضوں کے جینز کا موازنہ کیا گیا جس کے بعد یہ دریافت ہوا کہ بلڈ گروپ اے والے مریضوں میں کووڈ 19 کی شدت سنگین ہونے کا امکان زیادہ ہوتا ہے جبکہ بلڈ گروپ او کے حامل افراد میں یہ خطرہ کم ہوتا ہے۔
محققین کے مطابق بلڈ گروپ او والے افراد مخصوص پروٹینز کو شناخت کرنے کے معاملے میں بہتر ہوتے ہیں، جس سے انہیں تحفظ ملتا ہے۔
واضح رہے تحقیق کے نتائج طبی جریدے نیوانگلینڈ جرنل آف میڈیسین میں شائع ہوئے ہیں۔