عالمگیر وبا کورونا وائرس کی لہر نے کئی لاکھ انسانی جانوں کو تباہ کردیا لیکن اب تک اس وائرس کو ختم کرنے کے لئے کوئی بھی ویکسین کام نہ آسکی۔
عالمی ادارہ صحت کے ڈائریکٹر جنرل ڈاکٹر ٹیڈروس نے کہا ہے کہ کوئی بھی ملک اس وبا کا اکیلا مقابلہ نہیں کرسکتا، کورونا پر قابو پانے کے لئے عالمی یکجہتی کی ضرورت ہے۔
تفصیلات کے مطابق ڈائریکٹر جنرل ڈبلیو ایچ او نے ہدایت جاری کرتے ہوئے کہا کہ دنیا کے تمام ممالک مشترکہ سیکورٹی کے لئے مل کر کام کریں، تاکہ وائرس کو محدود کر کے اس پر قابو پایا جاسکے۔
انہوں نے کہا کہ ہم سب کے محفوظ ہونے تک کوئی محفوظ نہیں، ہم سب کو یہ سبق سیکھ لینا چاہیے، دنیا وائرس سے نمٹنے کے لئے ناکافی تیاریوں کی قیمت ادا کررہی ہے۔
ڈاکٹر ٹیڈروس کا مزید کہنا تھا کہ وائرس کے خلاف تیاری ایک وقت کی نہیں بلکہ مسلسل سرمایہ کاری ہے۔
واضح رہے کہ دنیا بھر میں کورونا وائرس سے اموات کی تعداد 4 لاکھ 74 ہزار سے تجاوز کر گئی ہے جبکہ پاکستان میں کورونا وائرس کیسز کی مجموعی تعداد ایک لاکھ 85 ہزار سے زائد اور 73 ہزار 478 افراد صحتیاب ہوچکے ہیں۔