عیدالاضحیٰ کے موقع پر کھالوں کے حوالے سے محکمہ داخلہ سندھ کی جانب سے حکم نامہ جاری کردیا گیا ہے۔
تفصیلات کے مطابق محکمہ داخلہ سندھ کے مطابق اس مرتبہ قربانی کی کھالیں صرف رجسٹرڈ خیراتی ادارے اور دینی مدارس ہی جمع کرسکتے ہیں۔
محکمہ داخلہ سندھ کی جانب سے جاری کیے جانے والے نوٹیفکیشن میں کہا گیا ہے کہ کمشنراور ڈپٹی کمشنرز کی اجازت کے بغیر قربانی کی کھالیں جمع کرنے پر پابندی ہوگی۔
سال 2019 کے اجازت نامے کے حامل افراد اور ادارے بھی کھالیں جمع کرسکتے ہیں۔ گاڑیوں پر کھالیں جمع کرنے پر پابندی ہوگی جبکہ زبردستی اور اسلحہ کے زور پر کھالیں جمع کرنا ناقابل برداشت جرم تصور کیا جائے گا۔
تاہم محکمہ داخلہ سندھ نے واضح کیا کہ قربانی کے دنوں میں اسلحہ لائسنس بھی معطل رہیں گے، کھالیں جمع کرنے والوں پر شناختی کارڈ اور پرمٹ ساتھ رکھنا لازمی ہوگا، حکومتی احکامات کی خلاف ورزی پرجمع شدہ کھالیں ضبط کرلی جائیں گی۔