محکمہ موسمیات کی جانب سے شہرِ قائد میں مون سون کے تیسرے اسپیل کی پیشن گوئی کردی گئی ہے۔
تفصیلات کے مطابق بھارتی شہر گجرات میں بننے والا یہ سسٹم سابقہ سسٹم سے قدرے کم ہے، مون سون کے تیسرے اسپیل کے تحت شہر میں ہفتے کو ہلکی اور اتوار کو درمیانی بارش متوقع ہے جس کا سلسلہ آئندہ تین روز تک برقرار رہنے کا امکان ہے۔
کراچی میں یہ سسٹم ہفتے کی صبح داخل ہوگا اور بارش کا سلسلہ پیر تک جاری رہے گا، اتوار کے روز درمیانی بارش کا امکان ہے۔
چیف میٹرولوجسٹ سردار سرفراز کا کہنا تھا کہ شہر میں مون سون کے تیسرے اسپیل میں ہلکی اور تیز بارش متوقع ہے اس سے قبل معمول سے تیز ہوائیں چل سکتی ہیں۔
انہوں نے بتایا کہ مذکورہ سسٹم کے تحت 20 ملی میٹر بارشوں کی توقع کررہے ہیں۔ ان کا مزید کہنا ہے کہ بارش کے سسٹم کی آمد سے قبل سمندری ہوائیں بند اور شمال مشرق یعنی بلوچستان کی ہوائیں چلنے کا امکان ہے جس کی وجہ سے کراچی میں گرمی کی شدت اور درجہ حرارت بڑھ جائے گا۔