عیدالاضحیٰ کی آمد آمد ہے اور شہری بڑی تعداد میں قربانی کے جانور خریدنے کے لیے منڈیوں کا رخ کر رہے ہیں، ہر سال کی طرح اس سال بھی خریداروں کا رش لگا پڑا ہے جبکہ کچھ خریدار قیمتیں سن کر ہی کانوں کو ہاتھ لگانے پر مجبور نظر آرہے ہیں۔
تاہم شہرِ قائد میں سپرہائی وے پر سجنے والی ایشیاء کی سب سے بڑی مویشی منڈی میں رواں سال کا سب سے بڑا اور مہنگا ترین جانور آ گیا ہے۔
تفصیلات کے مطابق کراچی کی مویشی منڈی میں سال 2020 کا سب سے مہنگا جانور آچکا ہے جس کا نام 'بادل' ہے، اس بیل کا وزن ایک ٹن سے زائد ہے۔
بادل کے مالک کا کہنا ہے کہ یہ دودھ، مکھن اور اصلی گھی بھی کھاتا ہے، تاہم قربانی کی غرض سے منڈی میں لائے گئے بیل کی قیمت 1 کروڑ روپے سے بھی زائد ہے۔
بڑی تعداد میں شہریوں نے بادل نامی اس بیل کو دیکھنے کے لیے منڈی کا رخ کیا جبکہ اس کی قیمت جان کر حیران ہی رہ گئے۔
ایک شوقین خریدار نے بادل نامی جانور کی 85 لاکھ روپے کی آفر کر دی ہے، تاہم اس کا مالک کم قیمت پر اسے فروخت کے لیے تیار نہیں۔
واضح رہے کہ پہلی بار منڈی میں اتنا مہنگا جانور فروخت کے لیے پیش کیا گیا ہے۔