مرکزی رویت ہلال کمیٹی کے سربراہ مفتی منیب الرحمٰن اور وفاقی وزیر برائے سائنس اینڈ ٹیکنالوجی فواد چوہدری میں ایک مرتبہ پھر بحث چھڑ گئی ہے۔
مفتی منیب نے کراچی میں پریس کانفرنس کی جس میں چاند کے حوالے سے بات کرتے ہوئے کہا کہ 'جتنی ڈگریاں فواد چوہدری کے پاس ہیں ہمارے پاس بھی ہیں، جنہوں نے فواد چوہدری کو کیلینڈر بنا کر دیا وہ ہماری کمیٹی کے ممبر ہیں'۔
منیب الرحمٰن کا کہنا تھا کہ 'ہم 25 سال سے رویت ہلال کو چلارہے ہیں، فواد چوہدری کہاں سے سائنس دان آگئے'؟
انہوں نے کہا کہ 'عید تین دن ہوتی ہے، عمران خان پیر کو بھی چھٹی کا اعلان کریں'۔
انہوں نے مزید کہا کہ 'سائنس اور علما میں کوئی اختلاف نہیں، ہمیں سائنس کا پتا ہے، جتنی سائنس آپ جانتے ہیں اتنی ہم بھی جانتے ہیں، محکمہ موسمیات کے میٹرولوجسٹ ہمارے ساتھ ہیں اور سائنسدان ہمارے ساتھ ہیں، ہماری کمیٹی میں شامل ہیں'۔