مشہور ترک سیریز ارطغرل غازی کے چرچے پاکستان سمیت دنیا کے کئی ممالک میں ہیں۔ اس ڈرامہ میں کام کرنے والا ہر اداکار مداحوں کے دل کے بے حد قریب ہے۔ ترک سیریز کے ناصرف ہیرو ہیروئن کے چرچے ہیں بلکہ معاون اداکاروں کو بھی بے حد شہرت حاصل ہے۔
تاہم ڈرامہ میں ارطغرل کے قریبی ساتھی 'دوحان ایلپ' (سپاہی روشان) کا کردار کرنے والے اداکار 'جاوید جیتن گُنیر' آج پاکستان کے دارالحکومت اسلام آباد آگئے ہیں۔
تفصیلات کے مطابق گزشتہ رات اداکار نے سماجی رابطے کی ویب سائٹ انسٹاگرام پر آفیشل اکاؤنٹ کے ذریعے اپنے بورڈنگ پاس کی تصویر مداحوں سے شیئر کی جو استنبول سے اسلام آباد کی فلائٹ کا تھا۔
11 گھنٹے قبل جاوید جیتن گُنیر کی جانب سے انسٹاگرام اسٹوری میں شیئر کی گئی بورڈنگ پاس کی تصویر کو دیکھ کر یہ اندازہ لگایا جاسکتا ہے کہ اداکار آج پاکستان کے دارالحکومت اسلام آباد پہنچ چکے ہوں گے۔