پاکستان اسکولز ایسوسی ایشن نے 24 نومبر سے 31 جنوری تک اسکولز بند کرنے کی تجویز کو مسترد کردیا۔
تفصیلات کے مطابق گزشتہ روز وفاق کی جانب سے اسکولز کو 24 نومبر سے 31
جنوری تک کرونا کے بڑھتے کیسز کے باعث سردیوں کی چھٹیاں دینے کی تجویز دی گئی جس پر وزیرِتعلیم سندھ سعید غنی نے کہا کہ سردیوں کی چھٹی کی ضرورت نہیں ہے،تاہم پاکستان پرائیویٹ اسکولز ایسوسی ایشن نے وزیرِتعلیم سندھ سعید غنی کے اعلان کی بھرپور حمایت کی ۔
اس ضمن میں پرائیویٹ اسکولز ایسوسی ایشن کی جانب سے ہنگامی اجلاس بلایا گیا جس میں کہا گیا کہ بچوں کا پہلے ہی تعلیم کا بے حد نقصان ہوچکا ہے ،اور کرونا ایس او پیز کو مدِ نظر رکھتے ہوئے تعلیمی اداروں میں بچوں کو متبادل دنوں میں یا متبادل شفٹوں میں اسکولز بلا یا جارہا ہے اور ہر ممکن کوشش کی جارہی ہے کہ کسی قسم کی کوئی کوتاہی نہ ہو ۔
پاکستان پرائیویٹ اسکولز ایسوسی ایشن کے چئیرمین پرویز ہارون نے واضح کیا کہ اگر کسی اسکول سے کرونا کا مثبت کیس سامنے آئے تو ایسے میں اس اسکول کو 15 روز کے لئے بند کیا جاسکتا ہے مگر ملک بھر کے اسکولز بند کرنا انتہائی غیر ذمہ دارانہ اقدام ہوگا اور نجی تعلیمی اداروں کے لئے یہ اقدام کسی بھی طرح قابلِ قبول نہیں ہے ۔ تاہم وفاق کی جانب سے پیش کردہ تجویز کو مسترد کردیا گیا ۔