عطااللہ خان کے انتقال کی خبریں وائرل، حقیقت سامنے آگئی

گزشتہ رات سے پاکستان کے لیجنڈ گلوکار عطااللّٰہ خان عیسیٰ خیلوی کے انتقال سے متعلق خبریں سوشل میڈیا پر وائرل ہورہی تھیں جس پر بہت سے لوگوں نے افسوس کا اظہار بھی کیا تھا۔

تاہم یہ خبریں بالکل بے بنیاد اور جھوٹی تھیں، جس کا اعتراف خود عطااللہ نے کیا ہے۔

تفصیلات کے مطابق اپنی موت سے متعلق جھوٹی خبریں وائرل ہونے کے بعد عطااللّٰہ خان عیسیٰ خیلوی نے اپنے فیس بک پر وضاحتی پوسٹ شیئر کرتے ہوئے اپنے حوالے سے چلنے والی تمام خبروں کو بے بنیاد اور جھوٹا قرار دیا۔

گلوکار نے لکھا کہ ''آج پھر ان کے حوالے سے غلط خبریں گردش کر رہی ہیں، ساتھ ہی انہوں نے وضاحت کی کہ وہ مداحوں کی دعاؤں سے بالکل ٹھیک ہیں''۔

یاد رہے یہ پہلی دفعہ نہیں کہ عطااللّٰہ کو اپنی زندگی سے متعلق پھیلنے والی جھوٹی خبروں پر وضاحت کرنی پڑی ہو، اس سے قبل بھی انہوں نے یا ان کے اہل خانہ نے ایسی ہی جھوٹی خبروں پر وضاحت دی تھی۔

گلوکار 2018 کے بعد مختلف اوقات میں کچھ بیماریوں کے باعث مختصر وقت کے لیے اسپتال میں زیر علاج بھی رہے اور اسی دوران ہی ان کے حوالے سے غلط خبریں وائرل ہوئیں۔