امریکہ کے مشہور ترین جریدے فوربز نے سال 2020 کی ایشیا پیسیفک کے 100 بااثر ترین فنکاروں کی فہرست جاری کی ہے۔

یہ فہرست اس بنیاد پر جاری کی گئی کہ جن فنکاروں کے سوشل میڈیا پر نہ صرف لاکھوں کی تعداد میں فالوورز ہیں بلکہ انہوں نےکورونا وبا کے دوران اپنے سوشل میڈیا اکاؤنٹس کو عوام میں آگاہی پھیلانے کے لیے بھی استعمال کیا۔

فوربز کی فہرست میں بھارت کے امیتابھ بچن، اکشے کمار، ہرتھیک روشن، شاہ رخ خان شامل ہیں۔ تاہم یہ اعزاز پاکستان کے تین فنکاروں کو ملا۔

1) ایمن خان

21 سالہ ایمن خان کے انسٹاگرام پر 7.7 ملین فالوورز ہیں، یہ انسٹاگرام پر پاکستان کی سب سے زیادہ فالو کی جانے والی اداکارہ ہیں۔ گزشتہ برس ایمن خان کو ڈراما سیریل ’’باندی‘‘ اور ’’عشق تماشا‘‘ میں بہترین اداکارہ کے لیے ہم ایوارڈز میں نامزد کیا گیا تھا۔

2) ماہرہ خان

پاکستان کی سپر اسٹار ماہرہ خان کا شمار ان اداکاراؤں میں ہوتا ہے جنہوں نے بہت کم عرصے میں کافی شہرت کمائی۔ ماہرہ خان کے انسٹاگرام پر تقریباً 7 ملین اور فیس بک پر 4 ملین سے زیادہ فالوورز ہیں۔ اداکارہ نے رواں سال اپنے سوشل میڈیا اکاؤنٹس کو دماغی صحت کے مسائل، خواتین پر تشدد اور چھاتی کے سرطان سے متعلق آگاہی پھیلانے کے لیے استعمال کیا۔

3) عاطف اسلم

پاکستان کے مشہور و معروف گلوکار عاطف اسلم بھی اس فہرست میں شامل ہیں۔ انسٹاگرام پر ان کے 5.3 ملین فالوورز ہیں۔ انہوں نے رواں سال مئی میں کورونا وبا کے دوران لوگوں میں امید جگانے کے لیے اسما الحسنیٰ ریلیز کیا تھا، جس میں انہوں نے اللہ کے 99 ناموں کی تلاوت کی تھی۔ یوٹیوب کی اس ویڈیو کو 22 ملین (2کروڑ 20 لاکھ) سے زائد لوگوں نے دیکھا تھا۔