کیا کبھی آپ نے فون کی کسی ایسی اسکرین کے بارے میں سنا ہے جو تیل کے استعمال سے ٹوٹ کر خود بخود دوبارہ جڑنے کی صلاحیت رکھتی ہو؟
تفصیلات کے مطابق کوریا کے سائنسدانوں نے السی کا تیل استعمال کرتے ہوئے ایسی اسمارٹ فون اسکرین تیار کی ہے جو ٹوٹنے کے بعد خود ہی جڑ جاتی ہے۔
جنوبی کوریا میں ''کوریا انسٹیٹیوٹ آف سائنس اینڈ ٹیکنالوجی'' کے سائنسدانوں نے السی کے تیل سے بھرے ہوئے خرد بینی کیپسول تیار کیے پھر انہی ''پولی ڈائی میتھائل سائلوگزین'' کہلانے والے شفاف سلیکون میں ملایا گیا۔ اس محلول کو روایتی سی پی آئی اسکرین پر لگا کر سکھایا گیا۔
کیے گئے تجربات کے دوران اسمارٹ فون اسکرین چٹخائی گئی اور اس میں دراڑیں ڈالی گئیں۔ تاہم اسی دوران مائیکرو کیپسولز بھی ٹوٹ گئے اور ان سے نکلنے والے السی کے تیل نے پولی امائیڈ سے کیمیائی عمل شروع کر دیا جس کے نتیجے میں اسکرین پر پڑنے والی دراڑیں دوبارہ صحیح ہونے لگیں۔
مذکورہ عمل کافی سست رفتار تھا جسے مکمل ہونے میں کئی گھنٹے لگے۔ اگر ہوا میں نمی 70 فیصد اور درجہ حرارت بھی 70 ڈگری سینٹی گریڈ ہو تو اسکرین جلد ہی پہلے جیسی (بالکل ٹھیک) ہوجائے گی۔
لیکن اگر اسکرین پر الٹراوائیلٹ شعاعیں ڈالی جائیں تو مائیکرو کیپسولز سے نکلنے والا السی کا تیل صرف 20 منٹ میں خشک ہو کر سخت ہوجائے گا جبکہ اسکرین پر پڑنے والی 95 فیصد دراڑوں کی مرمت ہوجائے گی۔
خیال رہے مذکورہ تحقیق کی تفصیلات ''کمپوزٹس پارٹ بی انجینئرنگ'' نامی ریسرچ جرنل کے شمارے میں شائع کی گئی ہیں۔