تفصیلات کے مطابق امریکی ریاست لاس اینجلس کی خاتون نے انعامی ٹکٹ غلطی سے واشنگ مشین میں کپڑوں کے ساتھ دھو دیا، خاتون 2 کروڑ 60 لاکھ ڈالر یعنی چار ارب روپے کی لاٹری جیت کر بھی انعامی رقم سے محروم ہوگئیں۔
لاٹری کے منتظمین نے خاتون کے دعوے کی تحقیقات شروع کردیں تاہم حکام کا کہنا ہے کہ ٹھوس ثبوت کے بغیر انعام نہیں دیا جاسکتا۔
رپورٹ کے مطابق لاٹری ٹکٹ جیتنے کا دعویٰ کرنے والی خاتون کا کہنا ہے کہ انہوں نے لاٹری کا ٹکٹ پتلون کی جیب میں چھوڑ دیا تھا اور وہ دھلائی کے دوران ضائع ہوگیا۔
کیلیفورنیا لاٹری کے سپر لوٹو پلس ٹکٹ کو نومبر میں لاس اینجلس کے نواح میں واقع ایک دکان پر فروخت کیا گیا تھا۔
امریکی میڈیا نے اس خاتون کا نام ظاہر نہیں کیا ہے اور مبینہ طور پر اس وقت اسٹور میں لاٹری ٹکٹ خریدتے وقت اُنھیں سی سی ٹی وی کیمرا نے عکس بند کیا تھا۔
لاٹری کے منتظمین کا کہنا ہے کہ ڈرا کے 180 دن کے اندر انعام پر دعویٰ کرنا ہوتا ہے، یہ ڈرا 14 نومبر کو ہوا تھا اور اس بھاری انعام پر دعویٰ جتانے کی حتمی تاریخ جمعرات کو تھی۔
لاٹری کے منتظمین نے ایک بیان میں کہا ہے کہ اگر جیک پاٹ کا کوئی حتمی فاتح سامنے نہیں آیا تو یہ رقم کیلیفورنیا کے سرکاری اسکولوں میں تقسیم کر دی جائے گی۔