ماہرین آثار قدیمہ کا خیال ہے کہ مجسمے کی مسکراہٹ کے خدوخال شہنشاہ کلاڈیوس سے مشابہت رکھتے ہیں۔
مصر کی وزارت نوادرات کا کہنا ہے کہ ماہرین آثار قدیمہ نے جنوبی مصر میں ایک قدیم عبادت گاہ میں کھدائی کے دوران مسکراتا ہوا ابوالہول کا چھوٹا مجسمہ اور ایک مزار کی باقیات دریافت کی ہیں۔
یہ نوادرات ہتھور کی عبادت گاہ کے قریب سے ملے تھے، جو مصر کے بہترین محفوظ قدیم مقامات میں سے ایک ہے۔
ملنے والے مجسمے کی ظاہری شکل رومن بادشاہ کلاڈیوس سے مشابہت رکھتی ہے اور یہ ایک مسکراتا ہوا چہرہ ہے جس کی گالوں پر ڈمپلز پڑے ہوئے ہیں۔
یہ مشہور اہرام مصر سے دریافت ہونے والے مجسمے سے بہت چھوٹا ہے۔ جو 20 میٹر (66 فٹ) بلند ہے۔
یہ نوادرات قاہرہ کے دارالحکومت سے 450 کلومیٹر دور جنوب میں صوبہ کینا میں ڈینڈرا کی عبادت گاہ میں دو منزلہ مقبرے کے اندر سے ملے ہیں۔
یہ بھی پڑھیے
مصر: ’اہرام مصر خلائی مخلوق نے تعمیر نہیں کیے تھے‘
’ہرم اکبر‘ میں پوشیدہ راہداری کی دریافت: ’اس راہداری کے نیچے بھی کوئی اہم چیز موجود ہو سکتی ہے‘
اہرام مصر پر برہنہ تصاویر اصلی ہیں یا ایڈیٹنگ کا کمال؟
ماہرین آثار قدیمہ کا خیال ہے کہ مجسمے کی مسکراہٹ کے خدوخال شہنشاہ کلاڈیوس سے مشابہت رکھتے ہیں۔ رومن بادشاہ کلاڈیوس نے 41 اور 54 عیسوی کے درمیان شمالی افریقہ میں رومن حکمرانی کو تقویت دی تھی۔
وزارت نوادارت کا کہنا ہے کہ ماہرین آثار قدیمہ پتھر پر کندھے ہوئے نشانات کا مطالعہ کریں گے، جس سے مجسمے کی شناخت کے بارے میں مزید معلومات سامنے آسکتی ہیں۔
’خوبصورت اور نفیس طریقے سے تراشے ہوئے‘ مجسمے کے علاوہ ماہرین آثار قدیمہ کو رومی دور کی ایک پتھر کی سل بھی ملی ہے جس پر قدیم مصری ڈیموٹک اور ہیروگلیفک طرز کی عبارت لکھی ہے۔
چونے کے پتھر کے مزار میں ماہرین آثار قدیمہ کو بازنطینی دور کا ایک دو منزلوں والا چبوترا اور مٹی کی اینٹوں کا بیسن بھی ملا ہے۔
کچھ ماہرین کے مطابق مصری حکومت کی ان دریافتوں سے زیادہ سیاح راغب ہوں گے اور مصر میں شدید اقتصادی بحران کے دوران سیاحت کی صنعت کو بحال کیا جا سکے گا۔