انڈیا کی ریاست تمل ناڈو کے شہر چنئی میں ایک شخص نے اپنی والدہ کی یاد میں ’تاج محل‘ جیسی عمارت بنائی ہے۔
امرالدین شیخ داؤد نامی ایک کاروباری شخصیت نے تاج محل کی طرح نظر آنے والی عمارت چنئی کے علاقے تھرووارور میں بنائی ہے اور اس بنانے میں پانچ کروڑ انڈین روپے خرچ ہوئے ہیں۔ہندوستان ٹائمز کے مطابق امرالدین شیخ جب 11 سال کے تھے اس وقت ان کے والد عبدالقادر انتقال کر گئے تھے جس کے بعد ان کی پرورش ان کی والدہ جیلانی بیگم نے کی۔رپورٹ میں کہا گیا ہے کہ امرالدین نے اپنی والدہ کو خراج عقیدت پیش کرنے کے لیے یہ ’تاج محل‘ بنوایا ہے۔یہ تاج محل جیسی عمارت بنانے کے لیے سنگِ مرمر راجستھان سے منگوایا گیا تھا اور اسے مکمل کرنے میں تقریباً دو سال لگے ہیں۔امرالدین کی جانب سے کہا گیا ہے کہ اس چھوٹے تاج محل پر ہر مذہب سے تعلق رکھنے والے لوگ آ سکتے ہیں ان کی والدہ سے عقیدت کا اظہار کرنے کے لیے۔خیال رہے اصل تاج محل اتر پردیش کے شہر آگرہ میں واقع ہے جو مغل بادشاہ شاہجہاں نے اپنی پسندیدہ اہلیہ ممتاز محل کے انتقال بعد بنوایا تھا۔