برطانوی میگزین دی اکانومسٹ نے دنیا کے پانچ سب سے کم قابل رہائش شہروں میں کراچی کو بھی شامل کرلیا۔
ڈان اخبار کی رپورٹ کے مطابق ای آئی یو گلوبل لائیوبلٹی انڈیکس 2023 میں کراچی کو دنیا کے 173 شہروں میں سے 169 ویں نمبر پر رکھا گیا ہے، فہرست میں چار شہروں لاگوس، الجزائر، طرابلس اور دمشق کو رہنے کے لحاظ سے کراچی سے بد تر شہر قرار دیا گیا ہے۔
فہرست میں شامل شہروں کی قابل رہائش ہونے کی درجہ بندی ان کے پانچ شعبوں کی کارکردگی کی بنیاد پر کی گئی ہے، ان پانچ شعبوں میں استحکام، صحت کی دیکھ بھال، ثقافت و ماحولیات، تعلیم اور انفرا اسٹرکچر شامل ہیں، یہ انڈیکس کورونا کے بعد کی صورتحال پر نظر رکھتے ہوئے مرتب کیا گیا ہے۔
انڈیکس میں قابل رہائش ہونے کے عوامل کا جائزہ لینے اور ان کی جانچ کرنے کے لیے ایک سے سو کی حد تک اسکور کو مرتب کیا جاتا ہے، جس میں نمبر ایک کو ناقابل برداشت اور 100 کو مثالی خیال کیا جاتا ہے۔
رہائش اختیار کرنے سے متعلق انڈیکس میں کراچی پاکستان کا واحد شہر ہے، اس کے علاوہ ملک کا کوئی شہر اس فہرست میں شامل نہیں ہے۔کراچی کا مجموعی اسکور 42اعشاریہ 5 ہے جو مثالی سے کم ہے، استحکام سے متعلق اشارے کے حوالے سے شہر میں سب سے زیادہ خراب صورتحال سامنے آئی۔
2019 میں کراچی انڈیکس میں 140 شہروں میں سے 136 ویں نمبر پر رہا جبکہ 2020 میں رپورٹ شائع نہیں ہوئی، اس کے بعد 2022 میں کراچی 140 شہروں میں سے 134 ویں نمبر پر رکھا گیا تھا۔