گوام کے امریکی ایئربیس پر کھڑے ایک فرانسیسی طیارے سے کینیڈین فوجی طیارہ ٹکرا گیا۔
فرانسیسی نیوز ایجنسی اے ایف پی کے مطابق فرانس کی مسلح افواج نے ایک بیان میں کہا ہے کہ اینڈرسن ایئربیس پر رائل کینیڈین ایئر فورس کا جہاز کے فرانسیسی اے 400 ایم کے ساتھ حادثے میں کوئی شخص زخمی نہیں ہوا۔تاہم دونوں طیاروں کے سٹیئرنگ سسٹم تباہ ہو گئے ہیں۔کینیڈین ایئر فورس نے اس حادثے کی تصدیق کی ہے، لیکن یہ نہیں بتایا کہ ٹکراتے وقت جہاز ٹیکسی کر رہا تھا یا پھر پارکنگ میں کھڑے کھڑے پھسل گیا۔فرانسیسی طیارہ علاقائی مشقوں کے لیے گوام ایئربیس پر موجود تھا۔ فرانس نے اس مشن کے لیے اپنے 20 طیارے بھیجے ہیں جن میں چار اے 400 ایم بھی شامل ہیں۔ فرانسیسی وزارت دفاع کا کہنا ہے کہ ’یہ مشق فرانس کی فورس پروجیکشن کے مظاہرے کے لیے ہے اور بہت مختصر وقت میں دنیا میں اپنے شہریوں اور ملکی مفادات کا دفاع کرنے کے لیے کی جا رہی ہے۔‘فرانس کے صدر ایمانویل میکخواں اس وقت علاقے میں تین جگہوں کے دورے پر ہیں جن میں نیو کیلیڈونیا، وانواتا اور پاپوا نیوگنی شامل ہیں۔