پاکستان اور سری لنکا کے درمیان دوسرے ٹیسٹ میچ کے تیسرے دن پاکستان کی پہلی اننگز کے دوران وکٹ کیپر بیٹر سرفراز احمد سر پر گیند لگنے کے باعث زخمی ہونے کے سبب ریٹائرڈ ہرٹ ہوگئے ہیں۔
سرفراز احمد پہلی اننگز میں 14 کے انفرادی سکور پر فاسٹ بولر آشیتھا فرنینڈو کی گیند سر پر لگنے سے زخمی ہوگئے جس کے بعد انہیں ریٹائرڈ ہرٹ ہونا پڑا۔سرفراز کے ریٹائرڈ ہرٹ ہونے کے بعد اُن کی جگہ وکٹ کیپر بیٹر محمد رضوان ’کنکَشَن‘ کے قانون کے تحت بیٹنگ کرنے آئے۔پاکستان کرکٹ بورڈ (پی سی بی) نے اپنی پریس ریلیز میں کہا کہ ’پاکستان اور سری لنکا کے درمیان کولمبو میں جاری دوسرے ٹیسٹ میچ کے دوران سرفراز احمد کی جگہ محمد رضوان کو کنکَشن کے قانون کے تحت ٹیم میں آئے ہیں۔ میچ ریفری ڈیوڈ بُون نے پاکستان کی متبادل کھلاڑی کو کھلانے کی درخواست کو قبول کیا ہے۔‘پی سی بی کا مزید کہنا ہے کہ ’میچ کے تیسرے دن آشیتھا فرنینڈو کے باؤنسر کو کھیلتے ہوئے سرفراز کے سر پر گیند لگی تھی۔ وہ پاکستان کرکٹ بورڈ کے میڈیکل پینل کے زیر نگرانی ہیں۔‘واضح رہے آئی سی سی کے کنکشن کے قانون کے تحت جب کسی بیٹر کو سر پر گیند لگتی ہے تو ٹیم فزیو فیلڈ پر ہی اُس کا معائنہ کرتا ہے۔ اگر بیٹر کو چکر آ رہے ہوں یا وہ مزید نہ کھیل پائے تو اُس کی جگہ دوسرے کھلاڑی کو کھلانے کی درخواست میچ ریفری سے کی جاتی ہے۔