قاہرہ۔28دسمبر (اے پی پی):اردن کے فرمانروا شاہ عبداللہ ثانی اور مصر کے صدر السیسی نے کہا ہے کہ وہ غزہ اور مغربی کنارے کے فلسطینیوں کی جبری بے دخلی کے کسی بھی اسرائیلی اقدام کو مسترد کرتے ہیں۔
اردو نیوز کے مطابق قاہرہ میں ہونے والی ملاقات کے دوران دونوں رہنماوں نے غزہ اور مغربی کنارے میں فلسطینیوں کی جبری بے دخلی اور مسئلہ فلسطین کو ختم کرنے کی تمام کوششوں کو مکمل طور پر مسترد کرنے کے موقف کا اعادہ کیا ۔اردن کے فرمانروا نے غزہ کے فلسطینی شہریوں کو بے دخل کرنے کی کسی بھی کوشش کے خلاف مصر کے مضبوط موقف کی حمایت کا اعادہ کیا۔بیان میں کہا گیا کہ دونوں رہنمائوں نے پوری دنیا کو غزہ میں فوری جنگ بندی اور غزہ کی المناک صورتحال اور مصائب کم کرنے کےلیے وسیع اور پائیدار انسانی امداد کی فراہمی کی ضرورت پر زور دیا۔دونوں رہنماوں نے کہا کہ عالمی برادری کے کندھوں پر اقوام متحدہ کی قراردادوں پر عملدرآمد کی بہت بڑی سیاسی اور اخلاقی ذمہ داری عائد ہوتی ہے تاکہ ان بین الاقوامی اداروں کی سالمیت کو برقرار رکھا جا سکے۔ انہوں نے غزہ کے کچھ حصوں پر دوبارہ قبضہ کرنے، محصور غزہ میں بفر زون بنانے یا اسے مغربی کنارے سے الگ کرنے کی کسی بھی کوشش کا مقابلہ کرنے کی ضرورت پر بھی زوردیا۔