دبئی۔29دسمبر (اے پی پی):دبئی میں سال نو کے حوالے سے منعقدہ تقریبات کے لیے تیاریاں مکمل کرلی گئی ہیں ۔عرب میڈیا کے مطابق دبئی گورنریٹ کی جانب سے نئے سال کے جشن کی نگرانی اور تیاری کے حوالے سے بنائی گئی کمیٹی کے ذمہ دار کا کہنا ہے کہ دبئی میں آتش بازی کے لیے 32 مقامات مخصوص کیے گئے ہیں جن میں سب سے بڑا شو برج خلیفہ میں ہوگا جبکہ جی بی آر ، جزیرہ النخلہ ، کایت بیچ پر بھی آتش بازی کے شاندار شو کیے جائیں گے۔
جشن کے انتظامات کے حوالے سے کمیٹی کا کہنا ہے کہ 11 ہزار 972 افراد پر مشتمل ٹیمیں تشکیل دی گئی ہیں جن میں 5 ہزار 574 پولیس اہلکاروں کے لیے شہری دفاع اور کسی بھی ہنگامی صورتحال سے نمٹنے کےلئے ایمبولینس اور امدادی یونٹس بھی تعینات کیے گئے ہیں۔دبئی پولیس کے آپریشنل ڈائریکٹر کرنل عبداللہ علی الغیثی نے بتایا کہ امن عامہ کے حوالے سے مختلف سرکاری اداروں کے اہلکاروں پرمشتمل ٹیمیں تشکیل دی گئی ہیں جو نئے سال کے جشن کے موقع پر مختلف مقامات پرذمہ داریاں انجام دیں گے۔کرنل الغیثی نے کہا کہ کسی بھی ہنگامی امداد حاصل کرنے کےلیے ٹول فری نمبر 901 اور 999 پر رابطہ کیا جاسکتا ہے۔ انتظامی کمیٹی کی جانب سے گمشدہ بچوں اور سامان کےلیےالگ الگ سینٹرز قائم کیے گئے ہیں۔جشن میں آنے والوں کی رہنمائی کے لیے گائیڈز کا بھی خصوصی انتظام کیا گیا ہے جبکہ ٹریفک کی روانی کو برقرار رکھنے کےلیے ٹریفک پولیس کے خصوصی دستے بھی موجود رہیں گے۔