ٹیکنالوجی کا نام ذہن میں آتے ہی ایلون مسک کا خیال آتا ہے کیونکہ وہ انسان جدید ٹیکنالوجی اور اے آئی پر کام کررہا ہے۔ ایلون مختلف بڑی کمپنیوں کے مالک ہیں۔
ایلون مسک کی حالیہ تحقیق سامنے آئی ہے۔ ان کی کمپنی نیورالنک نے دنیا میں پہلے انسان میں پہلی برین چپ لگا دی ہے۔
میڈیا رپورٹس کے مطابق ارب پتی شخصیت اور ایکس کے مالک ایلون مسک نے اتوار کو ایکس پر ایک ٹویٹ میں بتایا کہ نیورالنک نے انسان میں پہلی برین چپ نصب کی ہے۔
ایلون مسک نے اس حوالے سے کہا کہ اسٹارٹ اپ نیورالنک نے پہلی بار ایک انسانی مریض میں برین چپ لگائی ہے، اور جس مریض میں چپ لگائی گئی ہے وہ فالج کا شکار تھا جو اپنے خیالات کے ذریعے اب برین چپ کی مدد سے آلات کو قابو کر سکے گا۔
ان کا کہنا تھا کہ مریض امپلانٹ کے بعد اب تندرست ہوگیا ہے، اور امپلانٹ کے مثبت نتائج سامنے آئے ہیں ، چپ کے ذریعے دماغ کے اندر نیورونز کی سرگرمی (نیورون اسپائک) نظر آنے لگی ہے۔
امریکی فوڈ اینڈ ڈرگ ایڈمنسٹریشن (ایف ڈی اے) نے گزشتہ سال اس کمپنی کو انسانوں پر برین چپ امپلانٹ کرنے کے لیے پہلے ٹرائل کی اجازت دی تھی۔
اب چِپ ٹرائل میں نیورون اسپائک کی حوصلہ افزا نشان دہی ہو رہی ہے، نیشنل انسٹی ٹیوٹ آف ہیلتھ کے مطابق اسپائکس دراصل نیورونز کی سرگرمی ہے، یعنی ایسے خلیات جو دماغ کے اردگرد اور جسم کو معلومات بھیجنے کے لیے برقی اور کیمیائی سگنل استعمال کرتے ہیں۔
ایلون مسک کی یہ کمپنی دراصل دماغ اور کمپیوٹر کے درمیان بغیر تار والے انٹرفیس (نقطہ اتصال) کی آزمائش کر رہی ہے، تاکہ یہ دیکھا جا سکے کہ پیوندکاری اور سرجیکل روبوٹ کا استعمال محفوظ ہے۔