اسلام آباد۔23مئی (اے پی پی):یوکے ڈیپارٹمنٹ فار ٹرانسپورٹ (یو کے ڈی ایف ٹی) سکیورٹی اسسمنٹ ٹیم کا اسلام آباد انٹرنیشنل ایئرپورٹ کا دورہ مکمل ہوگیا۔ چار رکنی یوکے ڈی ایف ٹی سکیورٹی اسسمنٹ ٹیم کل(جمعہ ) کو اسلام آباد سے برطانیہ کے لیے روانہ ہوگی۔ پاکستان سول ایوی ایشن اتھارٹی کے صدر دفتر سے جاری بیان کے مطابق پاکستان سول ایوی ایشن اتھارٹی کے ڈائریکٹر ایوی ایشن سکیورٹی ایئر کموڈور ریٹائرڈ شاہد قادر کی قیادت میں ٹیم نے اسسمنٹ ٹیم کی میزبانی کی۔
انسپکٹرز نے ہوائی اڈے پر مختلف اداروں کی طرف سے نافذ کیے گئے ایوی ایشن سکیورٹی کے طریقہ کار اور عمل کا بغور جائزہ لیا۔ یو کے ڈی ایف ٹی ٹیم کے دورے کا مقصد ہوائی اڈے پر خاص طور پر برطانیہ کے لیے براہ راست پروازوں کے لیے مجموعی طور پر حفاظتی اقدامات کا جائزہ لینا تھا۔یو کے ڈی ایف ٹی ٹیم نے مسافروں، عملہ، سامان اور گاڑیوں کی سکریننگ، نیز ہوائی جہاز اور سامان کے تحفظ کے اقدامات کا جائزہ لیا۔انسپکٹرز نے برطانیہ کے لیے براہ راست پروازوں کے لیے اضافی حفاظتی اقدامات اور ہوائی اڈے پر دیگر اقدامات کا بھی جائزہ لیا، ہوائی اڈے پر محفوظ شہری ہوا بازی کے لئے سکیورٹی اقدامات کو نافذ کرنے والے متعلقہ اداروں کو یوکے ڈی ایف ٹی کے مقرر کردہ معیارکے مطابق پایا گیا۔یوکے ڈی ایف ٹی ٹیم نے ہوائی اڈے پر لاگو شہری ہوابازی کے حفاظتی اقدامات پر اطمینان کا اظہار کیا۔ ٹیم نے محفوظ فلائٹ آپریشنز کو یقینی بنانے کے لیے ہوائی اڈے کے سخت حفاظتی اقدامات کی تعریف کی۔بیان میں کہا گیا ہے کہ یوکے ڈی ایف ٹی ٹیم نے ڈی بریفنگ کے دوران پی سی اے اے کو چند سفارشات بھی پیش کیں۔اس سلسلے میں حتمی رپورٹ تین ہفتوں میں پی سی اے اے کو پیش کی جائے گی ۔دورے کے اختتام پر برطانوی ہائی کمیشن میں فرسٹ سیکرٹری ایوی ایشن (یو کے ڈی ایف ٹی) عبدالغفار نے پرتپاک استقبال پر پاکستان سول ایوی ایشن کا شکریہ ادا کیا اور کہاکہ دونوں ممالک کے درمیان اس طرح کی مصروفیات ان کے درمیان ہوا بازی کے تعلقات کو مزید فروغ دیں گی۔