اسلام آباد۔23مئی (اے پی پی):وفاقی وزیر صنعت و پیداوار اینڈ فوڈ سکیورٹی رانا تنویر حسین نے کہا ہے کہ موجودہ حکومت کی بہترین معاشی پالیسیوں کی بدولت آج ملک معاشی ترقی کی راہ پر گامزن ہے ، پرائیویٹ سیکٹر کو معیشت کی ترقی کے لئے آگے بڑھ کر اپنا کردار ادا کرنا ہو گا ، رچنا انڈسٹریل پارک اور دیگر خصوصی اقتصادی زونز معاشی ترقی کے لیے اہم سنگ میل ثابت ہوں گے۔ جمعرات کو یہاں ایک بیان میں انہوں نے کہا کہ اقتصادی زونز نے دنیا بھر کی معیشتوں کو بدل کر رکھ دیا ہے اور قوموں کو خوشحالی کی طرف گامزن کیا ہے ، رچنا انڈسٹریل پارک اور دیگر خصوصی اقتصادی زونز معاشی ترقی کے لئے اہم سنگ میل ثابت ہوں گے ۔
وفاقی وزیر نے کہا کہ صنعتی ترقی ملک کے معاشی منظر نامے کی تشکیل میں اہم کردار ادا کرتی ہے، ہماری کامیابی کا اصل پیمانہ ترقی، پائیداری، ہماری معیشت اور معاشرے پر پڑنے والے مثبت اثرات میں مضمر ہے، صنعت کی ترقی سے ملک کی ترقی وابستہ ہے، صنعت کا پہیہ چلے گا تو ملک معاشی طور پر مستحکم ہوگا۔ انہوں نے کہا کہ رچنا انڈسٹریل پارک کی تکمیل ہماری حکومت کے غیر متزلزل عزم کو واضح کرتی ہے، رچنا انڈسٹریل پارک چائنا پاکستان اکنامک کوریڈور کے تناظر میں بہت اہمیت رکھتا ہے کیونکہ یہ لاہور شیخوپورہ روڈ پر ایم 2 کے قریب اور ایم 5 کے نقطہ آغاز پر واقع ہے، یہ پاکستان اور چین کے درمیان تجارت اور تعاون کو بڑھانے کے لیے ایک اہم گیٹ وے کا کام کرے گا۔انہوں نے کہا کہ پی آئی ڈی سی اس بات کو یقینی بنائے گا کہ صنعتی ترقی ماحولیاتی استحکام کے ساتھ ہم آہنگ ہو، حکومتی اور نجی شعبوں کے درمیان قریبی تعاون سے ہی پائیدار اقتصادی ترقی حاصل کی جا سکتی ہے۔ رانا تنویر حسین نے کہا کہ صنعت غیر ملکی سرمایہ کاری کو راغب کرتی ہے اور اپنی برآمدی صلاحیت کو بڑھاتی ہے ، صنعتی پیداوار میں اضافہ غیر ملکی زرمبادلہ کی زیادہ آمدنی کا باعث بنتا ہے، صنعتی شعبہ معیشت کے دیگر مختلف شعبوں کی مدد کرتا ہے، صنعتیں مشینری، کھاد اور پروسیسنگ کی سہولیات کی فراہمی کو یقینی بناتی ہیں جس سے زرعی پیداوار میں بہتری آتی ہے۔انہوں نے کہا کہ صنعتی برآمدات ملک کے توازن ادائیگی میں اہم کردار ادا کرتی ہیں ، ان برآمدات سے زرمبادلہ پیدا ہوتا ہے جس سے عالمی سطح پر پاکستان کی مالیاتی پوزیشن مضبوط ہوتی ہے، ہماری حکومت نے پائیدار ترقی کو یقینی بنانے کا پختہ عزم کر رکھا ہے ۔ وفاقی وزیر نے کہا کہ معیشت کی بحالی مسلم لیگ(ن) کا ایجنڈا مشن اور اولین ترجیح ہے، بہترین معاشی پالیسیوں کی بدولت ملک معاشی ترقی کی راہ پر گامزن ہے ، وزیراعظم کی قیادت میں ملک میں بڑے پیمانے پر معاشی اصلاحات کا سلسلہ جاری ہے۔انہوں نے کہا کہ پرائیویٹ سیکٹر کو معیشت کی ترقی کے لئے آگے بڑھ کر اپنا کردار ادا کرنا ہو گا ، حکومت زراعت اور صنعت میں ایکسپورٹ کو بڑھانے کے لئے ٹھوس اقدامات کو یقینی بنا رہی ہے ، صنعت اور زراعت کی ترقی کے لئے مربوط حکمت عملی تشکیل دی ہے ، معیشت کی بحالی کے لئے کئے گئے اقدامات سے ملکی معیشت میں نمایاں بہتری آئی ہے۔ انہوں نے کہا کہ مسلم لیگ (ن) کی حکومت انتشار اور نفرت کی سیاست پر یقین نہیں رکھتی بلکہ ہماری حکومت عملی اقدامات پر یقین رکھتی ہے۔