اسلام آباد۔24مئی (اے پی پی):وفاقی وزیر امور کشمیر وگلگت بلتستان اور سیفران انجینئر امیر مقام نے خیبرپختونخوا حکومت کے بجٹ کو آئین ، وفاق پاکستان کی روح اور طے شدہ طریقہ کار کی خلاف ورزی قراردیتے ہوئے کہا ہے کہ خیبرپختونخوا حکومت نے بجٹ پیش نہیں، خیالی پلائو پیش کیا ہے۔ یہ شیخ چلی بجٹ ہے اور عید سے ایک دِن پہلے چاند نکالنے کی کوشش ہے۔ ذرائع آمدن کا تعین ابھی ہوا نہیں اور بجٹ بن گیا، اس پر صرف ہنسا جاسکتا ہے ۔ خیبرپختونخوا کے بجٹ پر اپنے ردعمل میں وفاقی انجینئر امیر مقام نے کہاکہ خیبرپختو خوا کا وفاق سے پہلے بجٹ پیش کرناغیرحقیقی اور صرف ایک پولیٹکل سٹنٹ ہے۔
انہوں نے کہاکہ پاکستان ایک وفاق ہے جو اکائیوں کے ساتھ مل کر بجٹ سازی کرتا ہے۔ یہ وفاق پاکستان کو نقصان پہنچارہے ہیں کیونکہ ایک طے شدہ آئینی و ریاستی طریقہ کار کو تسلیم کرنے کے لئے تیار نہیں۔ وزیر خزانہ کے پی کے کے اعدادوشمار اور بجٹ تخمینے سب وفاق سے ملنے والی رقوم کے اندازوں پر مبنی ہیں۔یہ توقعات اور امکانات پر مبنی بجٹ ہے جو ٹھوس منصوبہ بندی، معاشی حکمت عملی اور عوام کی فلاح اور ریلیف سے خالی ہے۔ اس لئے یہ فرضی بجٹ ہے ،عوام کو دھوکہ دینے کا نیا ناٹک ہے ۔انجینئر امیر مقام نے کہاکہ جب تک محاصل کا درست تخمینہ نہ ہو، اس وقت تک کے پی کے تخمینے سب مفروضی اور غیرحقیقی ہوں گے۔ وفاق میں محاصل(ریونیوز)جمع ہوتے ہیں اور مشاورت سے ان کی تقسیم کے امور طے ہوتے ہیں۔ انہوں نے کہاکہ وزیراعلی ٰخیبرپختونخوا نے خود تسلیم کیا ہے کہ وفاقی بجٹ آنے کے بعد کے پی کی بجٹ تجاویز میں ترامیم کریں گے۔ اس بیان کی روشنی میں یہ کہا جاسکتا ہے کہ کے پی کے کا بجٹ حقیقی نہیں محض مفروضہ اور ناٹک ہے۔ یہ تازہ شہد کے استعمال کا اثر لگتا ہے ۔ ایک طرف کہتے ہیں کہ وفاق ہمیں پیسے نہیں دے رہا دوسری طرف کہتے ہیں کہ ہمیں وفاق کی ضرورت نہیں اور خود بجٹ بناسکتے ہیں۔ یہ پہلے جھوٹ بول رہے تھے یا اب جھوٹ بول رہے ہیں۔وفاقی وزیر امور کشمیر اور پاکستان مسلم لیگ (ن) خیبرپختونخوا کے صدر نے صوبائی حکومت کو مخاطب کرتے ہوئے کہاکہ15 دِن پہلے ہی بتا رہے ہیں کہ صوبہ عوام کا ہے اور پاکستان کا ہے۔ اپنی سیاست کے لئے وفاق اور اکائیوں میں لڑائی کا تاثر نہ دیں ۔ عوام جانتے ہیں کہ آپ کا بٹن اڈیالہ سے دبتا ہے ۔ آپ پاکستان کے آئین اور وفاق پاکستان اور اکائیوں کے درمیان طے شدہ طریقہ کار کے پابند ہیں۔امیرمقام نے کہاکہ دس سال سے آپ خیبرپختونخوا میں مسلط ہیں۔ ساڑھے 300 ڈیم کہاں ہیں ؟دس سال میں ایک میگا واٹ بجلی میں اضافہ نہ کیا۔ کوئی ہسپتال بنا نہ تعلیمی ادارہ ۔ صوبہ 10 کھرب سے زائد کا مقروض اور معاشی طورپر کنگال کردیا۔ وفاقی وزیر نے کہاکہ پی ٹی آئی نے خیبرپختونخوا کو دس سال میں پاکستان کا سب سے زیادہ مقروض صوبہ بنادیا ہے ۔ بی آرٹی کا سالانہ خسارہ 6 ارب پر پہنچ چکا ہے۔ کرپشن میں خیبرپختونخوا سب سے آگے ہے ۔ انہوں نے کہاکہ آج بھی صوبے میں محکمہ تعلیم اور صحت کے شعبے کے ورکرز احتجاج کررہے ہیں۔