ہاردک پانڈیا کی اہلیہ نے اپنے انسٹاگرام ہینڈل سے ’سر نیم‘ کیوں ہٹا دیا؟

سوشل میڈیا پر انڈین کرکٹ ٹیم کے آل راؤنڈر ہاردک پانڈیا اور اُن کی اہلیہ نتاشا سٹینکووچ کے درمیان علیحدگی کی افواہیں گردش کر رہی ہیں۔

انڈین میڈیا کے مطابق افواہیں گردش کر رہی ہیں کہ ہاردک پانڈیا اور نتاشا سٹینکووچ کے درمیان معاملات اس وقت ٹھیک نہیں ہیں۔

نتاشا سٹینکووچ نے نہ صرف انسٹاگرام پر ہاردک پانڈیا کے ساتھ اپنی تصاویر ڈیلیٹ کر دی ہیں بلکہ انہوں نے اپنے شوہر کا سر نیم ’پانڈیا‘ بھی اپنے ہینڈل سے ہٹا دیا ہے۔

اہلیہ کی جانب سے نام اور تصاویر ڈیلیٹ کرنے کے بعد انڈیا میڈیا میں دونوں کے رشتے کے بارے میں مختلف قیاس آرائیاں کی جا رہی ہیں تاہم دونوں کی جانب سے اس بارے میں کوئی بیان سامنے نہیں آیا ہے۔

میڈیا اور سوشل میڈیا پر یہ افواہیں بھی گردش کر رہی ہیں کہ جوڑے کے درمیان طلاق ہو چکی ہے اور علیحدگی کے بعد تناشا سٹینکووچ ہاردک پانڈیا کی جائیداد کا 70 فیصد حصہ بھی لیں گی۔

سوشل میڈیا پر صارفین انڈین پریمیئر لیگ (آئی پی ایل) کے میچز میں نتاشا سٹینکووچ کی سٹیڈیمز میں غیر حاضری پر بھی حیران ہیں۔

رواں سال ہاردک پانڈیا کے لیے کرکٹ کے میدانوں میں بھی مشکلات سے بھرپور رہا ہے۔ 

ہاردک پانڈیا کو اس سال کے آئی پی ایل سیزن کے لیے ممبئی انڈینز کی ٹیم کا کپتان مقرر کیا گیا جس کے بعد ٹورنامنٹ کے آغاز کے کچھ میچز میں انہیں عوام کی جانب سے شدید تنقید کا نشانہ بنایا جاتا رہا۔

اس کے علاوہ اُن کی قیادت میں ممبئی انڈینز نے پورے ٹورنامنٹ میں 14 میں سے صرف چار میچوں میں کامیابی حاصل کی اور پوائنٹس ٹیبل پر سب سے آخری نمبر پر رہے۔

خیال رہے کہ ہاردک پانڈیا اور نتاشا سٹینکووچ کی شادی 31 مئی 2020 کو ہوئی تھی جس کے بعد جوڑے کے ہاں بیٹے کی پیدائش ہوئی۔

یاد رہے کہ نتاشا سٹینکووچ کا تعلق یورپ کے ملک سربیا ہے اور وہ پیشے کے لحاظ سے ماڈل ہیں۔