امریکی ایئر لائنز کی پرواز پر ساتھی مسافر کے ساتھ پرتشدد رویہ اپنانے کے نتیجے میں 34 سالہ خاتون پر اب تک کا سب سے زیادہ جرمانہ عائد کیا گیا جو نہ ادا کرنے کی صورت میں مقدمہ دائر کر دیا گیا ہے۔
امریکی اخبار نیو یارک ٹائمز کے مطابق سات جولائی 2021 کو ہیدر ویلز نامی خاتون نے ریاست ٹیکساس سے جانے والی پرواز میں ساتھی مسافر کو لاتیں ماریں اور ان پر تھوکا بھی۔پرتشدد رویے پر جہاز کے عملے نے خاتون کو ٹیپ کی مدد سے کرسی کے ساتھ باندھ دیا اور ان کے منہ پر بھی ٹیپ لگا دی۔فیڈرل ایوی ایشن اتھارٹی نے امریکی خاتون پر 81 ہزار 950 ڈالر کا جرمانہ ادا کیا جو اتھارٹی کے مطابق کسی بھی پرتشدد مسافر پر عائد کیا جانے والا سب سے زیادہ جرمانہ ہے۔خاتون نے اتنا عرصہ جرمانہ نہیں ادا کیا جس پر ایوی ایشن اتھارٹی نے ان پر مقدمہ دائر کر دیا ہے۔خاتون کے خلاف درج شکایت میں کہا گیا ہے کہ انہوں نے الکوحل منگوائی جس کے بعد وہ انتہائی چڑچڑی ہو گئیں اور جہاز سے باہر نکلنا چاہتی تھیں۔خاتون نے پھر کیبن کریو کا دروازہ کھولنے کی کوشش کی اور گالیاں دینا اور چیخنا شروع کر دیا۔سیٹ کے ساتھ باندھنے کے باوجود خاتون لاتیں مارتی اور تھوکتی رہیں اور فلائٹ کے عملے اور دیگر مسافروں کو کاٹنے اور انہیں سر مارنے کی کوشش کی۔خاتون کا رویہ مسلسل جارحانہ تھا جب تک کہ انہیں بے ہوش نہیں کر دیا گیا۔ شارلٹ ایئرپورٹ پر لینڈنگ کے بعد انہیں جہاز سے نکالا گیا۔جہاز کے عملے کو دھمکیاں اور حملہ کرنے کے علاوہ جہاز، عملے اور مسافروں کے تحفظ کو خطرے میں ڈالنے پر 45 ہزار ڈالر عائد کیے گئے ہیں جبکہ پرواز کے دوران جہاز کا دروازہ کھولنے کی کوشش پر 27 ہزار 900 ڈالر کا جرمانہ لگایا گیا ہے۔جبکہ جہاز کے عملے کے فرائض میں خلل پیدا کرنے پر 9 ہزار کا جرمانہ عائد کیا ہے۔