لندن: سعودی عرب کی فضائی کمپنی فلائی ناس کو انٹرنیشنل ٹریکس آرگنائزیش نے مسلسل ساتویں بار مشرق وسطی کی بہترین کم بجٹ ایئرلائن قرار دے دیا۔
غیر ملکی خبر رساں ایجنسی کے مطابق انٹرنیشنل ٹریکس آرگنائزیش نے فلائی ناس کو دنیا کی 3 سب سے کم لاگت والی ایئرلائز میں شمار کیا ہے۔
فلائی ناس کے سی ای او بندر المھنا نے لندن میں اسکائی ٹریکس ایوارڈز 2024 کی سالانہ تقریب میں شرکت کی اور اعزاز حاصل کیا۔
اسکائی ٹریکس ایوارڈ کے مطابق کم بجٹ ایوی ایشن سیکٹر میں فلائی ناس کا اپنی پوزیشن کو مستحکم رکھنا سعودی عرب کے لیے ایک کامیابی ہے۔
فلائی ناس کے سی ای او نے کہا کہ سعودی عرب مختلف شعبوں خاص طور پر ٹریول، ٹورازم اور ایوی ایشن میں دنیا کے ممالک میں سب سے آگے ہے۔ ان شعبوں پر سعودی وژن 2030 کے مطابق توجہ دی گئی ہے۔
انہوں نے اس کامیابی کو مسافروں کے اعتماد، ٹیم کی لگن اور سعودی قیادت کی طرف سے ملنے والی حوصلہ افزائی سے منسوب کیا جو تمام سعودی کمپنیوں کو حکومت کی طرف سے حاصل ہے۔
یہ بھی پڑھیں: لندن جانے والی بھارتی پرواز کو بم سے اڑانے کی دھمکی
واضح رہے کہ اسکائی ٹریکس ایوارڈ کا فیصلہ ہر سال مسافروں کی ووٹنگ سے ایک جامع سروے کے ذریعے کیا جاتا ہے اور یہ دنیا بھر میں ایوی ایشن انڈسٹری میں سب سے باوقار ایوارڈز میں سے ایک ہے۔
فلائی ناس نے اپنا فضائی سفر 2007 میں شروع کیا تھا اور آج 1500 سے زیادہ ہفتہ وار پروازوں کے ذریعے 70 سے زیادہ ملکی اور بین الاقوامی مقامات سے خود کو جوڑے ہوئے ہے۔ اس کا ہدف سعودی وژن 2030 کے مطابق 165 ڈومیسٹک اور انٹرنیشنل مقامات تک پہنچنا ہے۔