بجٹ پر حکمراں جماعت مسلم لیگ ن اور پاکستان پیپلز پارٹی کے درمیان تحفظات اور اختلافات دور کرنے کے لیے دونوں جماعتوں کی مشترکہ کمیٹیاں تشکیل دے دی گئیں ہیں۔ یہ کمیٹیاں وزیراعظم شہباز شریف اور بلاول بھٹو زرداری کے درمیان ملاقات میں ہونے والی گفتگو کی روشنی میں آگے بڑھیں گی اور لائحہ عمل طے کریں گی۔جمعرات کو بجٹ پر پیپلز پارٹی کے تحفظات کے حوالے سے چیئرمین بلاول بھٹو زرداری کی وزیراعظم شہباز شریف سے ملاقات ہوئی۔
وزیراعظم ہاؤس کی جانب سے جاری اعلامیے کے مطابق شہباز شریف اور بلاول بھٹو کے درمیان ون آن ون ملاقات ہوئی۔ بلاول بھٹو، یوسف رضا گیلانی، خورشید شاہ، سینیٹر شیری رحمان، نوید قمر اور راجہ پرویز اشرف کے ہمراہ وزیراعظم ہاؤس پہنچے۔
انہوں نے بجٹ پر اپنی پارٹی کے تحفظات سے وزیراعظم کو آگاہ کیا۔ ملاقات کے بعد شہباز شریف نے پیپلز پارٹی کے چیئرمین اور وفد کے اعزاز میں عشائیہ بھی دیا۔مسلم لیگ ن کے ذرائع کے مطابق وزیراعظم شہباز شریف نے بلاول بھٹو کو بجٹ کے معاملے پر پیپلز پارٹی کے تحفظات دور کرنے کا یقین دلایا جبکہ بلاول بھٹو نے بجٹ منظوری میں تعاون کی یقین دہانی کرائی۔ذرائع کے مطابق بلاول بھٹو نے وفاقی بجٹ پر پیپلز پارٹی کو اعتماد میں نہ لینے کا معاملہ وزیراعظم کے سامنے رکھا۔بلاول بھٹو نے وزیراعظم سے کہا کہ ’پیپلز پارٹی نے ایک معاہدے کے تحت حکومت کی حمایت کی مگر حکومت اُس معاہدے پر عمل نہیں کر رہی۔‘اس کے علاوہ انہوں نے پنجاب حکومت کی جانب سے پیپلز پارٹی کے خلاف کیے گئے اقدامات پر بھی شکوہ کیا اور کہا کہ صوبائی حکومت پنجاب میں ان کی جماعت کو محدود کر رہی ہے۔وزیراعظم شہباز شریف نے بلاول بھٹو کے بیشتر نکات سے اتفاق کیا اور معاملات کے حل کے لیے کمیٹیاں تشکیل دے دیں۔ پیپلز پارٹی اور حکومت کی کمیٹیاں کل جمعے کو ملاقات کر کے وزیراعظم اور بلاول بھٹو سے ملاقات کی روشنی میں معاملات کو آگے بڑھائیں گی۔بلاول بھٹو نے وزیراعظم سے پنجاب حکومت کی جانب سے پیپلز پارٹی کے خلاف کیے گئے اقدامات پر بھی شکوہ کیا۔ (فوٹو: وزیراعظم ہاؤس)ملاقات کے دوران وزیراعظم شہباز شریف کا کہنا تھا کہ معیشت کے حوالے سے مثبت اعشاریے آ رہے ہیں، سٹاک مارکیٹ میں تاریخی تیزی کاروباری طبقے کی طرف سے بجٹ کی توثیق ہے، ملکی ترقی و خوشحالی اور عوامی فلاح و بہبود کے لیے تمام سیاسی جماعتوں کو مل کر کام کرنا ہے۔انہوں نے کہا کہ نئے مالی سال کے بجٹ میں عام آدمی کو ریلیف دینے کے لیے اقدامات اٹھائے گئے ہیں۔ملاقات میں حکومت کی جانب سے سپیکر قومی اسمبلی سردار ایاز صادق، نائب وزیراعظم و وفاقی وزیر خارجہ اسحاق ڈار، وفاقی وزیر منصوبہ بندی احسن اقبال، وفاقی وزیر خزانہ و محصولات محمد اورنگزیب، وفاقی وزیر اطلاعات و نشریات عطا اللہ تارڑ، وزیراعظم کے مشیر برائے سیاسی امور رانا ثنااللہ، وزیر مملکت برائے خزانہ و محصولات علی پرویز ملک اور سابق وفاقی وزیر خواجہ سعد رفیق بھی موجود تھے۔واضح رہے کہ وزیراعظم شہباز شریف نے بلاول بھٹو کو عید الاضحیٰ کی مبارک باد کے لیے فون کر کے انہیں بجٹ سے متعلق تحفظات پر بات چیت کے لیے مدعو کیا تھا۔