"ارے بجلی والو. خدا کے لیے ہم پر رحم کرو. صرف ایک اے سی کا بل 60 ہزار کیسے ہو سکتا ہے؟ اب عوام پر اور کتنے ٹیکس لگاﺅ گے؟ 20 ہزار بجلی ہوگا اور اس پر 40 ہزار روپے کا ٹیکس دینا ہوگا؟"
یہ دہائی دینے والی ہیں ملک کی نامور اداکارہ اور فلم ڈائریکٹر سنگیتا جو اس ماہ بجلی کا بل دیکھ کر بلبلا اٹھی ہیں.
سنگیتا کا کہنا ہے کہ اس مہینے میرے گھر 60 ہزارر وپے کا بل آیا ہے جس میں میرے گھر کا بل 20 ہزار جبکہ 40 ہزار روپے ٹیکس کی مد میں ادا کرنے ہوں گے.
سنگیتا مزید کہتی ہیں کہ میں صرف ایک اے سی چلاتی ہوں. دوسرے اے سی میں نے رکھ دیے ہیں، وہ لگائے ہی نہیں ہیں لیکن پھر بھی 60 ہزار روپے کا بل آیا ہے.
واضح رہے کہ اس سے پہلے صدارتی ایوارڈ یافتہ اداکار راشد محمود بھی بجلی کے بل کے خلاف ویڈیو اپلوڈ کرچکے ہیں. ان کا اس ماہ کا بل 45 ہزار سے زیادہ تھا جس پر وہ سخت دلبرداشتہ ہیں.
اس کے علاوہ ماضی کی اداکارہ نشو بیگم کا بل ایک لاکھ روپے آیا ہے جبکہ مشہور کامیڈین غفار لہری بھی اس ماہ بجلی کا بل دیکھ کر صدمے کا شکار ہیں..
غفار لہری کا کہنا ہے کہ میرا کرائے کے چھوٹا سا گھر ہے جس میں صرف ایک پنکھا چلتا ہے. میرا بجلی کا بل تین ہزار روپے بل آنا چاہیے تھا لیکن 20 ہزار روپے کا بل بھیجا گیا ہے. جب معلومات کرنے گیا تو بجلی فراہم کرنے والے ادارے کا کہنا تھا کہ یہ بل ہر حال میں ادا کرنا ہوگا. غفار لہری کا کہنا تھا کہ ہم جیسے آرٹسٹ کو اتنے بھاری بل بھیجنا مارنے کے برابر ہے. ہمیں 6 ماہ تک کام نہیں ملتا. حکومت سے سوال ہے کہ اتنا بھاری بل ہم کیسے ادا کریں؟