ای کامرس کمپنی ایمازون کا کہنا ہے کہ کمپنی رواں برس کے آخر تک برطانیہ میں ڈرونز کے ذریعے پیکج ڈیلیور کرنا شروع کر دے گی۔
آن لائن شاپنگ کمپنی کو برطانیہ میں ڈرون کے استعمال کو بڑھانے کے لیے کی جانے والی آزمائش کے لیے چنا گیا ہے۔ کمپنی کا کہنا ہے کہ وہ چھوٹے پیکجز کو آرڈر کیے جانے کے ایک گھنٹے کے اندر ڈیلیور کریں گے۔
یہ کمپنی ان چھ اداروں میں سے ایک ہے جس کا انتخاب سول ایوی ایشن اتھارٹی نے بیونڈ وژوئل لائن آف سائٹ (بی وی ایل او ایس) ڈرون فلائٹس کی آزمائش کے لیے کیا ہے۔ بی وی ایل او ایس کا مطلب ہے کہ پرواز کرتے ان گیجٹس کی نگرانی کے لیے آپریٹرز کی ضرورت نہیں ہوگی۔
کمپنی امریکا میں کیلیفورنیا کے شہر لوکفورڈ اور ٹیکساس کے شہر کالج اسٹیشن میں ڈرون کے ذریعے پہلے ہی پیکجز ارسال کر رہی ہے۔
یہ ڈرون برطانیہ کے فُلفِلمنٹ سینٹرز میں سے ایک میں قائم اپنی بیس سے 12 کلومیٹر تک کے فاصلے تک پرواز کر سکیں گے۔