امریکی وزیر خارجہ انتھونی بلنکن نے شام کی صورتحال پر کہا ہے کہ ’اسد حکومت کی جانب سے ’قابلِ اعتماد سیاسی عمل‘ میں شامل ہونے سے انکار اور روس اور ایران کی حمایت پر بے جا انحصار اس کے خاتمے کا باعث بنا۔‘ اُن کا کہنا تھا کہ ’امریکہ شامی عوام کے خلاف ہونے والی زیادتیوں کے لئے اسد حکومت کو جوابدہ بنانے کی کوششوں کی حمایت کرے گا۔‘
- روسی کے سرکاری میڈیا کے مطابق شام کے سابق صدر بشارالاسد ماسکو میں ہیں جہاں انھیں پناہ دی جائے گی۔
- روس کی وزارت خارجہ نے کہا ہے کہ بشارالاسد نے اپنا عہدہ اور ملک چھوڑنے سے قبل تنازع میں شریک تمام مسلح گروہوں سے بات چیت کی
- ایرانی میڈیا کے مطابق شام کے دارالحکومت دمشق میں ایرانی سفارتخانے پر حملے کی اطلاعات موصول ہوئیں
- باغی گروہ ہیئت تحریر شام کا کہنا ہے کہ وہ ’کسی بھی صورت میں‘ کیمیائی ہتھیاروں کا استعمال نہیں کریں گے
- روسی وزیرِ خارجہ نے کہا ہے کہ باغی گروہ ہیئت تحریر شام کے عسکری آپریشن کی ’منصوبہ بندی لمبے عرصے پہلے کی گئی تھی۔‘
- اقوامِ متحدہ کے نمائندہ برائے شام گیئر پیڈرسن نے مطالبہ کیا ہے کہ شامی حکومت اور اپوزیشن کے درمیان اقتدار کی منتقلی کے حوالے سے سکیورٹی کونسل کی قرارداد کے تحت 'فوری سیاسی مذاکرات' ہونے چاہییں۔
بشار الاسد بمعہ اہلخانہ ماسکو پہنچ گئے: ’معزول شامی صدر اپنی حکومت کے خاتمے کے خود ذمہ دار ہیں،‘ امریکہ
