واٹس ایپ کی جانب سے میسجنگ پلیٹ فارم میں گمراہ کن تفصیلات کے پھیلاؤ کو روکنے کے لیے گوگل کے ساتھ مل کر کام کیا جا رہا ہے۔
Wabetainfo کی رپورٹ کے مطابق واٹس ایپ کے ویب ورژن میں اس فیچر کی آزمائش کی جا رہی ہے۔
اس فیچر کے ذریعے صارفین کو میسجنگ پلیٹ فارم میں شیئر کی جانے والی تصاویر کی ساکھ کو جانچنے کا موقع ملے گا۔
رپورٹ میں بتایا گیا کہ ویب ورژن کے نئے بیٹا (beta) ورژن میں اس فیچر پر آزمائش کی جا رہی ہے تاکہ صارفین کو ویب پر گوگل سرچ میں تصاویر کی حقیقت جاننے کے لیے ریورس سرچ کا موقع ملے سکے۔
اس فیچر کے ذریعے صارفین کو گوگل پر تصویر اپ لوڈ کرنے کا موقع ملے گا تاکہ معلوم ہوسکے کہ ویب پر وہ تصویر موجود ہے یا نہیں۔
اس سے انہیں تصویر کے تناظر کو سمجھنے میں مدد ملے گی اور وہ تعین کرسکیں گے کہ اس فوٹو کو بدلا تو نہیں گیا۔
رپورٹ میں مزید بتایا گیا کہ امیج سرچ کے لیے گوگل پر اپ لوڈ کی جانے والی تصاویر کو گوگل ہی ہینڈل کرے گا اور واٹس ایپ کو اس تصویر کے مواد تک رسائی حاصل نہیں ہوگی۔
واٹس ایپ کی جانب سے اس سے ملتے جلتے فیچر کی آزمائش اینڈرائیڈ ایپ میں بھی کی جا رہی ہے۔
اس حوالے سے نومبر 2024 میں ایک رپورٹ میں سرچ آن ویب آپشن کے بارے میں بتایا گیا تھا جس کے ذریعے صارفین ریورس امیج سرچ کرسکتے ہیں۔
یہ فیچر ابھی بیٹا ورژن میں سامنے آیا ہے۔
گوگل میں ریورس امیج سرچ کا فیچر کافی عرصے سے موجود ہے مگر اسے واٹس ایپ کا براہ راست حصہ بنانے سے صارفین کو زیادہ سہولت مل سکے گی۔
یعنی صارفین تصویر کو ڈاؤن لوڈ کیے بغیر ریورس سرچ کرسکیں گے اور کسی اور ایپ یا براؤزر کے بغیر اسے گوگل پر اپ لوڈ کرسکیں گے۔
ابھی یہ واضح نہیں کہ یہ فیچر کب تک اینڈرائیڈ ایپ یا ویب ورژن میں باضابطہ طور پر متعارف کرایا جاسکتا ہے۔