بنگلہ دیش میں بالی ووڈ اداکارہ کنگنا رناوت کی فلم ایمرجنسی پر بھارت اور بنگلہ دیش کے خراب تعلقات کے باعث پابندی عائد کردی گئی ہے۔
واضح رہے کہ بھارتی اداکارہ کنگنا رناوت کی ڈائریکشن میں بننے والی یہ فلم جمعہ 17 جنوری کو ریلیز ہوگی، فلم کی کہانی بھی انہوں نے ہی لکھی ہے۔
بھارتی میڈیا رپورٹس کے مطابق یہ فلم 1975 میں سیاسی صورتحال کے باعث اس وقت کی وزیراعظم اندرا گاندھی کی جانب سے ملک میں لگائی جانے والی ایمرجنسی کے تناظر میں بنائی گئی ہے جس میں کنگنا مرکزی کردار ادا کررہی ہیں۔
بھارتی میڈیا کا کہنا ہے کہ فلم پر بنگلہ دیش میں لگنے والی پابندی کی اصل وجہ فلم کا مواد نہیں بلکہ دونوں ممالک کے درمیان جاری سیاسی کشیدگی ہے۔
اس فلم میں بھارتی فوج اور اندرا گاندھی کے کردار کو اجاگر کرنے کے ساتھ شیخ مجیب الرحمان کی مدد کی بھی تصویر کشی کی گئی ہے۔
اس سے قبل کنگنا نے پریانکا گاندھی کو اپنی آنے والی فلم ’ایمرجنسی‘ دیکھنے کی دعوت بھی دی تھی۔
کنگنا کا کہنا تھا کہ انہوں نے پریانکا گاندھی کو فلم دیکھنے کے لیے دعوت نامہ بھجوایا ہے۔
کنگنا کا بھارتی میڈیا سے بات کرتے ہوئے کہنا تھا کہ میری پریانکا گاندھی سے پارلیمنٹ میں ملاقات ہوئی تھی اور اس وقت جو پہلی بات میں نے ان سے کہی وہ یہ تھی کہ آپ کو فلم ایمرجنسی دیکھنی چاہیے۔
میری بات پر پریانکا گاندھی نے بہت ہی اچھے اور نرم انداز میں کہا تھا کہ ہاں ہو سکتا ہے میں فلم دیکھوں۔
کنگنا نے کہا کہ تو دیکھتے ہیں کہ وہ فلم دیکھنا چاہیں گی یا نہیں، میرے خیال میں یہ فلم ایک واقعے اور ایک شخصیت کی بہت ہی حساس اور سمجھدار تصویر کشی ہے۔