بولی وڈ کے نامور اداکار سیف علی خان پر ہونے والے جان لیوا چاقو حملے کے بعد ان کی حفاظت کی ذمہ داری ایک اور مشہور شخصیت، رونیت رائے، المعروف مسٹر بجاج، نے سنبھال لی ہے۔ 59 سالہ رونیت، جو ڈرامہ سیریل کسوٹی زندگی کی سے شہرت کی بلندیوں پر پہنچے، ممبئی میں ایک پروفیشنل سیکیورٹی ایجنسی چلاتے ہیں، جس کی خدمات اب سیف علی خان کے لیے حاصل کی گئی ہیں۔
رونیت رائے نے اس حوالے سے میڈیا سے بات کرتے ہوئے کہا، "یہ وقت بہت نازک ہے، اور میں سیف علی خان کے ساتھ کھڑا ہوں۔" تاہم انہوں نے فراہم کی گئی سیکیورٹی کے حوالے سے مزید تفصیلات بتانے سے معذرت کر لی۔
سوشل میڈیا پر وائرل ہونے والی ایک ویڈیو میں دیکھا جا سکتا ہے کہ مسٹر بجاج خود سیف کی رہائش گاہ کے باہر حفاظتی انتظامات کا جائزہ لے رہے ہیں۔ ان کی سنجیدگی اور پروفیشنلزم نے مداحوں کی توجہ حاصل کر لی۔
یہ تمام حفاظتی اقدامات اس وقت اٹھائے گئے جب سیف علی خان اپنے گھر میں ہونے والے چاقو حملے میں شدید زخمی ہو گئے تھے۔ چھ دن کے طویل علاج کے بعد، آج انہیں اسپتال سے رخصت کر دیا گیا۔ اسپتال سے باہر آتے ہوئے سیف سفید شرٹ اور نیلی جینز میں دکھائی دیے۔ کمزوری کے باوجود انہوں نے مداحوں کا شکریہ ادا کیا اور ہاتھ جوڑ کر دعائیں لیں۔
سیف کی حفاظت کے لیے کیے گئے سخت اقدامات نہ صرف ان کی فیملی بلکہ فلم انڈسٹری کے دیگر ستاروں کو بھی تحفظ کا احساس دلا رہے ہیں۔ اس واقعے کے بعد بالی وڈ میں خوف کی لہر دوڑ گئی ہے، اور دیگر اداکاروں نے بھی اپنی سیکیورٹی مزید سخت کرنے پر غور شروع کر دیا ہے۔