آغا ان کھلاڑیوں میں سے نہیں جو آزمائش کے ہنگام سر جھکا کر مفاہمت اپنا لیں، وہ پلٹ کر وار کرتے ہیں۔ جب جنوبی افریقی اننگز کسی بہت بڑے مجموعے کی سمت بھاگتی جا رہی تھی، تب بھی آغا ہی نے اچانک وہ ناقابلِ یقین کیچ کیا جس نے سبک خرام پروٹیز پیش قدمی سست کر دی۔
پاکستانی بلے باز سلمان آغا کا کراچی کے نیشنل سٹیڈیم میں سینچری بنانے کے بعد ایک اندازیہ خیال ہی کس قدر مضحکہ خیز تھا کہ جو ٹورنامنٹ پاکستان نے چیمپئینز ٹرافی کی تیاری میں سجایا اور اسے اپنے نوتعمیر شدہ سٹیڈیمز کی نقاب کشائی کا وسیلہ بنایا، اِسی کے فائنل تک یہ میزبان خود ہی نہ پہنچ پاتا۔
کرکٹ سے جڑی ایک ضخیم معیشت ہے جس کا مکمل انحصار کھیل اور مسابقت کی معنویت پر ہے۔ اگر پاکستان کی میزبانی میں منعقدہ ٹورنامنٹ کے فائنل میں دو مہمان ٹیمیں کھیل رہی ہوتیں تو یقیناً شائقین کے ساتھ ساتھ براڈکاسٹرز کے جذبات بھی خاصے مجروح ہوتے۔
اس ادراک نے پاکستانی ڈریسنگ روم میں وہ روح پھونک دی جو کئی تاریخی ریکارڈز پھلانگتے ہوئی فتح کی صورت شائقین کے ذہنوں میں ایسی نقش ہو گئی کہ سالہا سال کی داستانوں کا حصہ رہے۔
صائم ایوب کی انجری نے پاکستانی تھنک ٹینک کو کئی ایک آزار دیے ہیں اور چیمپئینز ٹرافی سے عین پہلے جب ایک طے شدہ فاتحانہ کمبینیشن یوں اوپر تلے تبدیلیوں کا ہدف بن جائے تو امکانات بھی مثبت نہیں رہتے۔
اس بیٹنگ آرڈر میں فخر زمان کے سوا سبھی بلے بازوں کو، اپنی قوت سے قطع نظر، اس ترتیب پر بیٹنگ کرنا پڑ رہی ہے جو ٹیم کی ضرورت ہے۔ اگرچہ انٹرنیشنل سطح پر کسی بھی بلے باز کو اس قابل ہونا چاہیے کہ وہ بدلتی ترتیب سے خود کو ہم آہنگ کر سکے مگر اس ہم آہنگی کو جو وقت درکار ہوتا ہے، اب وہ بھی میسر نہیں۔
ایسے میں یہ ریکارڈ ساز فتح مزید خوش کُن ہو کر اُبھرتی ہے کہ کراچی میں نہ صرف پاکستان نے اپنی ون ڈے تاریخ کا بلند ترین تعاقب اپنے نام کیا بلکہ یہ کارنامہ اس بیٹنگ آرڈر کے ساتھ انجام دیا جہاں سبھی بلے باز اپنے نئے کرداروں سے ہم آہنگ ہونے کی کوشش کر رہے ہیں۔
باوومہ نے ٹاس کی خوش بختی تو اپنے نام کر لی مگر وہ جانتے تھے کہ ایک نوآموز بولنگ یونٹ کے ساتھ جیت کھوجنے کے لیے انھیں سکور بورڈ پر ایسا ہندسہ درکار ہو گا جس کے دفاع میں کچھ کوتاہیوں کی گنجائش بھی نکل پائے۔
بریٹزکے، باوومہ اور کلاسن نے اپنی جارحیت سے پاکستانی بولنگ کے ڈسپلن کی آزمائش کرتے ہوئے وہ ہندسہ سکور بورڈ پر جڑ دیا جسے پاکستان نے کبھی تعاقب میں عبور نہیں کیا تھا۔
کگیسو ربادا اور مارکو یئنسن کی خدمات سے محروم جنوبی افریقی اٹیک کو پاور پلے میں ہی وہ ضرب لگ گئی جس کے بعد اعتماد کی بحالی دشوار تھی۔ پچ کے تقاضوں سے ناواقف کوربن بوش نری پیس کی راہوں میں بھٹکتے رہ گئے اور فخر زمان نے پہلا پاور پلے پاکستان کے نام کیا۔
مگر وائن ملڈر کے سپیل نے منھ زور پاکستانی اننگز کو واپس گھٹنوں کے بل لاکھڑا کیا۔ کپتان اور نائب کپتان دونوں شاید توقع نہیں کر رہے تھے کہ انھیں اتنی جلدی کریز پر آنا پڑے گا اور پاکستان اچانک ایسے دباؤ میں آ چکا ہو گا۔
گو دباؤ سے نمٹنے میں محمد رضوان بھی کئی یادگار اننگز رقم کر چکے ہیں مگر سلمان آغا کا معاملہ کچھ الگ ہے۔
جہاں اکثر سمجھدار بلے باز دباؤ کے لمحات میں سوجھ بوجھ سے کام لیتے ہوئے کچھ وقت خاموشی سے گزارنے کو ترجیح دیتے ہیں، وہاں سلمان علی آغا دباؤ کا جواب واپس دباؤ سے دیتے ہیں۔
آغا ان کھلاڑیوں میں سے نہیں جو آزمائش کے ہنگام سر جھکا کر مفاہمت اپنا لیں، وہ پلٹ کر وار کرتے ہیں۔ جب جنوبی افریقی اننگز کسی بہت بڑے مجموعے کی سمت بھاگتی جا رہی تھی، تب بھی آغا ہی نے اچانک وہ ناقابلِ یقین کیچ کیا جس نے سبک خرام پروٹیز پیش قدمی سست کر دی۔
انگلینڈ کے خلاف ٹیسٹ سیریز میں جب انہوں نے فاتحانہ سینچری بنائی تھی تو ’ایکس‘ پہ، معروف فلمی ڈائیلاگ ’اپنا ٹائم آئے گا‘ کی برمحل تضمین کرتے ہوئے سلمان آغا نے ’اپنا ٹائم آغا‘ کی پوسٹ لکھی تھی۔
کراچی میں جو اننگز انھوں نے کھیلی، یہ اُن کے کرئیر کا ایک تشنہ گوشہ بھی تھی۔ جس مہارت اور صلاحیت کے وہ بلے باز ہیں، ان کے ون ڈے اعدادوشمار میں سنچری کا خانہ خالی ہونا ایک ناانصافی سی معلوم ہوتا تھا۔
گو اس سے پہلے وہ جن نمبروں پر کھیلتے آئے ہیں، وہاں سے سینچری تک پہنچ پانے کا وقت بھی کم ہی باقی رہتا مگر یہاں انھیں نمبر بھی درست ملا اور وقت بھی کافی، ضرورت صرف دباؤ جھیلنے اور اسے جذب کرنے کی تھی۔
جبکہ محمد رضوان نے اپنا کنارہ سنبھالے رکھنے کو ترجیح دی، سلمان آغا نے دباؤ جذب کرنے کی بجائے اسے واپس پلٹانے کا عزم کیا۔ اور ان کا عزم ایسا با ثمر رہا کہ نہ صرف اپنی ٹیم کو فائنل تک لے گیا بلکہ پاکستان کی چیمپئینز ٹرافی کی تیاری سے جڑے کئی سوالات کے جواب بھی دے گیا۔
