میٹا نے آرٹی فیشل انٹیلی جنس (اے آئی) ٹیکنالوجی پر مبنی انسانوں جیسے روبوٹ تیار کرنے کی منصوبہ بندی شروع کردی ہے۔
خبر رساں ادارےکے مطابق سوشل میڈیا کمپنی کی جانب سے انسان نما روبوٹ ہارڈ وئیر تیار کرنے پر کام کیا جا رہا ہے اور وہ آرٹی فیشل انٹیلی جنس (اے آئی) ٹیکنالوجی کو اس مقصد کے لیے استعمال کرنا چاہتی ہے۔
میٹا کی جانب سے اس سے قبل ورچوئل رئیلٹی ہیڈ سیٹس اور اسمارٹ گلاسز تیار کیے گئے ہیں۔ مگر اب یہ کمپنی گھریلو کاموں میں مدد فراہم کرنے والے روبوٹس تیار کرنا چاہتی ہے۔
رپورٹ میں بتایا گیا کہ اس حوالے سے ابھی کوئی حتمی فیصلہ تو نہیں ہوا مگر اس آپشن کو مسترد بھی نہیں کیا گیا۔
رپورٹ میں مزید بتایا گیا کہ میٹا کی جانب سے روبوٹ تیار کرنے والی کمپنیوں جیسے فگر اے آئی اور دیگر سے بات چیت بھی شروع کر دی گئی ہے، تاکہ ان کو سافٹ وئیر، سنسرز اور کمپیوٹنگ پیکجز فراہم کیے جائیں جو میٹا رئیلٹی لیبز نے تیار کیے ہیں۔
میٹا کا یہ ڈویژن روبوٹیکس سیفٹی اسٹینڈرڈ کی تیاری پر بھی توجہ مرکوز کرے گا۔
میٹا کے سی ٹی او اینڈریو بوسورتھ نے کمپنی کے ایک اندرونی میمو میں لکھا کہ رئیلٹی لیبز اور اے آئی کے شعبے میں ہم جو سرمایہ کاری اور پیشرفت کر رہے ہیں، اسے روبوٹیکس کے شعبے میں آگے بڑھنے کے لیے استعمال کیا جاتا ہے۔
انہوں نے کہا کہ ہمارا ماننا ہے کہ میٹا پراڈکٹس میں اضافے سے میٹا اے آئی کی قدر میں اضافہ ہوگا۔