امریکی کمپنی کا خلائی جہاز اتوار کو کامیابی کے ساتھ چاند پر اتر گیا اور اس سنگ میل کو حاصل کرنے والا صرف دوسرا نجی مشن بن گیا۔ یہ پہلا خلائی جہاز ہے جس نے عمودی لینڈنگ کی۔
غیر ملکی خبر رساں ادادے کی رپورٹ کے مطابق ایک امریکی کمپنی نے کامیابی کے ساتھ اپنا خلائی جہاز چاند پر اتار لیا۔
مذکورہ کامیابی کسی بھی نجی مشن کے ذریعے حاصل کی گئی دوسری بڑی کامیابی ہے اور پہلی بار کسی نجی مشن نے عمودی (اپ رائٹ ) لینڈنگ کی ہے۔
ٹیکساس کے شہر آسٹن کے کنٹرول روم سے بلیو گھوسٹ لینڈر کے چاند پر اترنے کے عمل کی نگرانی کی گئی۔
چاند پر بالکل درست لینڈنگ کرنے والا یہ پہلا پرائیوٹ مشن ہے جو امریکی خلائی ادارے ناسا کے لیے تجربات کرے گا۔
فائر فلائی ایرو اسپیس کا مشن جنوری کے وسط میں لانچ کیا گیا تھا، آسٹن میں موجود مشن کنٹرول ٹیم میں اس وقت خوشی کی لہر دوڑ گئی جب کمپنی کے سی ای او جیسن کم نے تصدیق کی کہ خلائی جہاز مستحکم اور عمودی پوزیشن میں ہے۔
بلو گھوسٹ کے پروگرام مینیجر رے ایلنزورتھ نے بتایا کہ لینڈر ہدف سے صرف 100 میٹر کے اندر اترا جو کہ انتہائی درستگی کی علامت ہے۔
انہوں نے کہا کہ ہم نے لینڈنگ کے دوران دو بار خطرے سے بچاؤ کے لیے خودکار طور پر راستہ بدلا، جس کا مطلب ہے کہ ہمارا سافٹ ویئر بالکل ویسے ہی کام کر رہا تھا جیسے اسے کرنا چاہیے تھا۔