انسٹا گرام صارفین کے لیے میسجز شیڈول کرنے کا فیچر آخرکار متعارف کرا دیا گیا ہے۔
میٹا کی زیر ملکیت فوٹو شیئرنگ ایپ میں شیڈول دی میسج فار لیٹر نامی فیچر کو متعارف کرانے کا اعلان فروری 2025 میں کیا گیا تھا۔ اب یہ فیچر صارفین کو دستیاب ہے۔
انسٹا گرام ڈائریکٹ میسجز (ڈی ایمز) کے لیے اس نئے فیچر سے صارفین دوستوں کے لیے پیغامات کو شیڈول کرسکیں گے۔
یعنی ڈی ایمز میں جاکر اپنا پیغام تحریر کریں یا ویب لنک شیئر کریں اور پھر اسے اپنے پسند کے وقت کے مطابق شیڈول کر دیں۔
اس طرح یہ فکر نہیں رہے گی کہ میسج کو کہیں محفوظ کرکے درست وقت کا انتظار کریں یا بھیجنا ہی بھول جائیں۔
فیچر کو استعمال کرنے کا طریقہ جانیں
انسٹا گرام کے میسجز شیڈول فیچر کو استعمال کرنے کا طریقہ کار بہت آسان ہے۔
اس کے لیے انسٹا گرام ڈی ایمز کو اوپن کریں اور وہاں اس دوست کی چیٹ ونڈو کھولیں جس کو میسج بھیجنا چاہتے ہیں۔
میسج تحریر کرنے کے بعد سینڈ بٹن کو کچھ دیر تک دبا کر رکھیں، ایسا کرنے پر شیڈولر کا آپشن سامنے آئے گا۔
اس کے بعد مطلوبہ تاریخ اور وقت کا انتخاب کریں اور پھر سینڈ بٹن کو کلک کریں۔
جب آپ سینڈ بٹن پر کلک کریں گے تو پھر شیڈول میسج چیٹ میں نظر آئے گا اور اس پر کلک کرکے آپ میسج کو فوری طور پر بھیج سکیں گے یا ڈیلیٹ کرسکیں گے۔
آپ ایک میسج کو 29 دن تک کے لیے شیڈول کرسکتے ہیں جبکہ خود اپنے لیے بھی میسج کو شیڈول کرسکتے ہیں، یعنی اس فیچر کو اپنے لیے ریمائنڈر کے طور پر استعمال کرسکتے ہیں۔
البتہ آپ تصاویر یا ویڈیو کو شیڈول نہیں کرسکتے بس تحریری پیغامات کے لیے ہی اس فیچر کو استعمال کیا جاسکتا ہے۔