بھارت کے شہر پونے میں ایک نشے میں دھت شخص نے مصروف ترین سڑک کو جم میں بدل دیا، جہاں وہ چلتی گاڑیوں کے بیچ پش اپس کرتا رہا۔ حیران کن مناظر دیکھ کر راہگیروں اور ڈرائیورز کی آنکھیں پھٹی کی پھٹی رہ گئیں، جبکہ یہ عجیب و غریب منظر کیمرے کی آنکھ میں قید ہو کر دیکھتے ہی دیکھتے سوشل میڈیا پر وائرل ہو گیا۔
یہ حیرت انگیز واقعہ 5 اپریل کی شام پونے کے علاقے سوار گیٹ کے قریب پیش آیا، جہاں ایک شخص نشے کی حالت میں گاڑیوں کی قطاروں کے درمیان ہی اپنے مسلز بنانے میں مصروف نظر آیا۔ بظاہر بے خوف نظر آنے والے اس شخص نے خطرے کی پروا کیے بغیر زمین پر لیٹ کر پش اپس لگانے شروع کر دیے، جبکہ آس پاس کی گاڑیاں بمشکل اس سے بچ کر نکل رہی تھیں۔
سوشل میڈیا صارفین نے جب یہ ویڈیو دیکھی تو دلچسپ تبصروں کی بھرمار ہو گئی۔ ایک صارف نے مذاق میں لکھا، "یہ وہ آدمی ہے جسے نہ گاڑیاں روک سکتی ہیں، نہ قانون!" جبکہ دوسرے نے طنزیہ انداز میں کہا، "شاید اس کا ماننا ہے کہ اصلی باڈی بلڈر وہی ہوتا ہے جو خطرے کے بیچ ٹریننگ کرے!"